12/08/2014 13:53:06

KORRUPSIONI ? HETONI TË RINJTË

Kryetari i Gjykatës së Apelit në Shkodër Fuat Vjerdha, flet për etikën e komunikimit të një gjykatësi dhe korrupsionin e togave të zeza. ''Mendoj se një gjykatës, para se të bëhet gjykatës duhet të kalojë në një kohë të gjatë si asistent''

HermesNews - Një prej mendimeve më të shpeshta kur bëhet fjalë për ambjentet e togave të zeza është padyshim korrupsioni. Përplasjet e fundit mes KLDsë dhe qeverise shqiptare, me siguri nuk e kanë përmirësuar reputacionin e gjyqtarëve, përkundrazi, ka shtuar pikëpyetjet.
Sa më e rëndë akuza, aq më e vështirë është të provosh se një gjyqtar është i korruptuar. Një arsye pse shqiptarët preferojnë të bëjnë vetëgjyqësi, por dhe etika në sjellje është tjetër elementët bazë i një standardi europian, i munguar në Shqipëri.

Komunikimi gjyqtar - i pandehur, apo gjyqtar - avokat, brenda sallave të gjyqeve janë deri diku të rëndomta,fyese në disa raste, por, “Me rregjistrimin e seancave gjyqsore, etika e sjelljes së gjyqtarit ka ardhur drejt përmirësimit”, thotë në një eksluzive për HermesNews kreu i Gjykatës së Apelit Fuat Vjerdha.

Gjyqtarët nga njëra anë frenohen kur e dinë se dikush tjetër do të vlerësojë atë çfarë kanë thënë. Por etika është detaj i vogël kur mendon se korrupsioni i sistemit gjyqsor është një plagë që nuk do të zhduket krejt kollaj.

E para sepse qytetarët u besojnë pak gjykatave dhe kanë paragjykime të mëdha dhe e dyta sepse brezi i ri i gjytarëve, nuk ka ndërmend të bëjë ndryshimin. Me siguri që nuk vlen për të gjithë, por ky pohim vjen tamam nga një gjykatës. "Nuk kanë dinjitet, s’kanë integritetin që duhet të ketë gjyqtari", pohon.

"Unë kam 20 vjet në këtë post dhe bëj një jetë normale, nuk kam luks. Nuk jemi ende në gjendje të blejmë një shtëpi. Magjistratët e rinj kanë bërë pasuri të paluajtshme, në pak kohë", pohon.

Si kanë mundur t'i bëjnë ? Një përgjigje e frikshme. Pesimist për të adhmen ky mur i lartë që kanë ngritur këta magjistratë, të cilët në ambjente të veçanta dallohen shumë mirë. Çfarë mund të bëjnë qytetarët kur nuk e hedh dot poshtë as një Ministri, apo Qeveri ? Apo mos ndoshta nuk ka funksionuar pikërisht sepse nuk e kanë provuar seriozisht vetë qytetarët ?

"Si mund të ndryshohet kjo? " pyes gjykatësin. "Mendoj se një gjykatës, para se të bëhet gjykatës duhet të kalojë në një kohë të gjatë si asistent gjykatësi, apo ndihmës ligjor. Profesioni nuk merret vetëm në libra", thotë.

Gjithë këtë mund t'a përmbledhim me vlera, mbi të gjitha vlera të larta morale dhe etikë. "Emërimi i gjyqtarëve, është i mirë sepse e ke të përjetshëm vendin e punës. Po e caktove një gjyqtar është shumë e vështirë t'a heqesh nga puna, por ka dhe elementa të tjerë që duhet të merren parasysh, jo vetëm teoria", thotë kryetari.

Mesatarisht një gjyqtar paguhet rreth 100 mijë Lekë, (120 mijë një kryetar gjykate në apel) një 2% rritje page kur i kalon 15 vite në punë. Por me siguri për disa nuk është e mjaftueshme.

“Jam dakord, për të hetuar gjyqtarët që kanë të gjitha pasuritë e paluajtshme, pasuritë dhe paratë", thotë Vjerdha. "Me vjen zor që t’i them dikujt jam gjyqtar. Në Shqipëri kur prezantohetsh me kënd të shofin shtrembër", kur i thua çfarë profesioni bën.

Çfarë mendon për përplasjen mes KLDsë dhe Ministrise së Drejtësisë ?, e pyes. "(KLD) nuk është se nuk ra dakord (për pezullimin, apo shkarkim). KLD hodhi poshtë kërkesën e ministrit për pezullimin nga detyra të këtyre gjyqtarëve. Nuk mund ta paragjykosh kur është nën hetim. KLD tha, hetimet të vazhdojnë, por jo t’i paragjykosh, apo t’i pezullosh", vijon. "Ekzekutivi tenton të fusë në orbitë e vet gjyqësorin. Kur ka gjykatës të vjetër që korruptohen, nuk ka sesi të mos korruptohen të rinjtë".

Por korrupsioni është gjithmonë i vështirë të denoncohet, sepse ai që denoncon korrupsionin, ndëshkohet për korrupsion aktiv. Pse duhet të denoncojë atëherë ? Imagjinoni qenin që kafshon bishtin e vet. Duhet kulturë e rregulla të reja loje.























"A tentojnë t’ju korruptjnë ?”, pyes gjykatësin. "Shoqëria është e tëra e korruptuar. Personat përfitojnë prej qëndrimit ligjor por dhe klement e të butë në raste të caktuara, me vendime të ligjshme e të bazuara në prova. Ka njerëz (të tretë) që u thonë të pandehurve se këtë vendim e ke fale meje. U marrin para se gjoja do të flasin ata me gjykatësin. Në çdo rast mund të abuzojnë me gjyqin dhe më gjykatësit", tha.

Në Shqipëri njerëzit paguajnë sepse mendojnë se gjyqet fitohen vetëm kur korrupton. Në fakt gjykatësit ka raste që nuk dinë asgjë për gjithë këtë. Dikush tjetër merr merita dhe para. Por ka raste që gjykatësit kanë dhe sekserët e vet. Kurrë mos thuaj kurrë. Atëherë cili është ilaçi ? Me siguri, paraja jo.

"Si ndjehesh në gjithë këtë vorbull ?" e pyes. "I nderuar që jam gjyqtar, përveç se është është një profesion me të cilin mbaj familjen. Njerëzit na respektojnë, ka dhe prej atyre që na besojnë. Nganjëherë shitësit na bëjnë zbritje në çmime (buzëqesh)".

"Po atyre qe e gjitha kjo nuk u mjafton ?"

"Gjykatësve të rinj u këshilloj të punojnë me ligjin dhe të mendojnë që tek të pandehurit, Zoti merr formën e gjyqtarit, kur ai pret vendimin. Ne jemi Zoti dhe Zoti duhet të jetë i drejtë", përfundon. //HermesNews ©2014//

Doriana Metollari

Dërgo me email | Stampo artikullin