Kampioni shqiptar i Regby-së në Kinë

KINE - Të bësh sport nuk është aspak e vështirë, por të luash regby duhet ta mendosh mirë. Girsian Priska, një i ri shqiptar, i cili prej 6 vjetësh jeton në qytetin e Wuhanit në qendër të Kinës, duket se e ka gjetur veten fort mirë me këtë sport. Të luante regby për herë të parë nisi rastësisht, por duket se nuk ka ndërmend të largohet prej tij. Si shqiptari i vetëm që luan këtë lloj sporti në Kinë, ai ndihet i lumtur që tashmë jo vetëm ka gjetur veten e tij me anë të fizikut që ka, por edhe t’ju tregojë të tjerëve se shqiptarët dinë të jenë shumë të fortë për cdo lloj sporti, qoftë edhe këtu në Kinë. Në një intervistë ekskzluzive për HermesNews, Girsian Priska, rrëfen momentet e para, dëshirën për regby-në, por edhe cfarë planesh ka për më pas.

Girsian Priska, ti je njëri ndër përfaqësuesit e skuadrës së Wuhanit në Kinë, për njërin nga sportet më të rinj, rugby. Si lindi dëshira për ty personalisht për këtë lloj sporti?
Unë për herë të parë kam luajtur rugby në Wuhan, në qendër të Kinës, atje ku unë studioj dhe jetoj prej 6 vjetësh. Nuk mendoja se do të mund të bëja dicka serioze për këtë sport, pasi është sport i tillë që kërkon forcë fizike por edhe trup të mirë gjithashtu. Ishin disa shokë të huaj nga zona e Paqësorit të cilët studiojnë këtu në Wuhan. Pasi më thanë se cfarë kishin menduar, si dhe duke parë fizikun tim të bëshëm, filluan të më thonë se unë e kam trupin të mirë për këtë lloj sporti dhe se duhet të nis të stërvitem pasi kam fizikun e duhur por edhe moshën e re. Pashë një ndeshje stërvitore të tyren dhe mendja m’u mbush. Nisa më pas të trajnohem dhe stërvitem që para një viti e gjysmë. Deri tani kam ecur shumë mirë.

Emocionet e ndeshjes së parë pasi nise ruby-në?
Emocionet kanë qenë të mëdha. Ka qenë një ndeshje mes ekipit përfaqësues këtu në Wuhan, ekipit të qytetit Hangzhou dhe Nanjing. Isha jo shumë i përqëndruar, pasi ishte jo vetëm hera e parë që po luaja zyrtarisht, por edhe rregullat nuk i dija shumë mirë. Madje, edhe u dëmtova jo pak gjatë kësaj ndeshjeje.

A është arritur ndonjë fitore me skuadrën tënde?
Para një jave unë dhe skuadra ime e Wuhanit, kemi arritur që të fitojmë turneun e regby-së në Hangzhou. Aktualisht jam duke u stërvitur goxha fuqishëm, pasi mbas dy javësh kemi një tjetër ndeshje të rëndësishme turneu në Shanghai, ndeshje e cila nëse do ta fitojmë do të kemi “mundësinë” unë dhe shumë të tjerë të luajmë zyrtarisht në Kinë apo edhe ne Azi. Shpresoj shumë për këtë gjë.

Ky është sport thuajse i panjohur ose shumë pak i njohur në Shqipëri. A ka shqiptarë të tjerë këtu në Wuhan, apo edhe në pjesë të tjera të Kinës të cilët e ushtrojnë regby?
Me thënë të drejtën, pasi u bëra pjesë e këtij sporti, nisa të interesohem nëse ka edhe shqiptarë të tjerë në pjesë të tjera të Kinës. Pashë se nuk kishte asnjë tjetër, të paktën për aq sa unë pashë. Jam shqiptari i vetëm tani për tani në Kinë që ushtroj dhe luaj sportin e regby-së. Di që në Japoni është goxha i zhvilluar si sport, por deri tani nga kërkimet e mia kam parë se jam shqiptari i vetëm që luaj regby në Kinë dhe në Azi.

A ka lidhje Girsi me ndonjë skuadër rugby në Shqipëri?
Pasi përfundova disa vjet studimesh këtu në Wuhan, u ktheva për pushime në Shqipëri. Dëshira për të gjetur ndonjë lojtar apo se mund të kishte persona që mund të luanin rugby, më bëri që të nis kërkimet në internet, kërkime që për fat të mirë sollën rezultat. Pashë se kërkoheshin persona të cilët duhet të kishin një fizik të fuqishëm dhe të interesuar për këtë lloj sporti. Shumë shpejt do zhvillohej një ndeshje miqësore mes skuadrës që përfaqëson kombëtaren shqiptare në Itali, si dhe skuadrës që përfaqëson kombëtaren në Shqipëri. Nuk prita më, por direkt kontaktova me ta, kontakt i cili bëri që pas takimit të isha i mirëpritur me kënaqësi të madhe në skuadrën e rugby-së.

Arrite që të jesh pjesë e kësaj ndeshjejes të mirëpritur nga të gjithë?
Sigurisht. Ndeshja u zhvillua në ambjentet e stadiumit Selman Stërmasi. Ishte një ndeshje shumë e bukur, pasi jo vetëm që ishte e para por edhe e vetmja e llojit të saj në vend. Shumë i lumtur që isha pjesë e kësaj ndeshjeje. Jo vetëm që kemi luajtur me kënaqësi të madhe, por kemi arritur që të promovojmë sportin e ruby-së, pasi në Shqipëri ky lloj sporti është thuajse i panjohur, por edhe sepse shqiptarët i kanë shumë qejf sportet me kontakte të drejpërdrejta fizike.

Si e sheh Girsi zhvillimin e këtij sporti në Shqipëri?
Pas ndeshjes së parë që kemi zhvilluar në Shqipëri, lojtarët ishin tepër të kënaqur. Ata dhe unë vazhdojmë dhe kemi shumë dëshirë që ta ushtrojmë këtë sport. Unë personalisht besoj se do të ecë goxha mirë. Shqiptarët i kanë qejf sportet. Regby është sport që kërkon adrenalinë shumë të madhe, kontakt fizik dhe goxha fizik të mirë.

Cfarë ndryshimi ka regby këtu në Kinë dhe në Shqipëri?
Nuk e di shumë mirë se cfarë do të bëhet më tej në Shqipëri, por mendoj se ndryshim për mua personalisht është ushtrimi. Unë këtu në Kinë ushtrohem sistematikisht, pasi sic e thashë është sport që do shumë fizik dhe forcë të madhe. Në Shqipëri mendoj se ushtrimi i tij është i dobët nga ata që duan të luajnë regby.

Nga informacionet që ke deri tani, a ka në Shqipëri tranjerë ose specialistë të cilët duhet të merren me të interesuarit e regby-së për t’i trajnuar?
Unë di që në Shqipëri është një ish-sportist që ka luajtur regby për një kohë prej 5 vjetësh në Angli. Ka luajtur atje për disa vjet, por e ndërpreu më pas luajtjen për shkak të një dëmtimi jo të vogël. Pas kthimit në Shqipëri, di që ky është pikërisht trajneri që ushtron dhe stërvit klubin “Tirana Lions Regby Club”.

Dëshira e Girsit, është që të vazhdojë të luajë regby këtu në Kinë, apo të kthehet dhe të luajë në Shqipëri?
Unë jam ende duke jetuar në Kinë. Unë e kam vendosur që të luaj regby dhe nuk do të merrem ne asnjë sport tjetër, pasi jam tërhequr shumë pas këtij sporti. Shpresoj që të arrij të gjej një ekip të duhur ose të mirë ose këtu në Kinë, ose në vende të tjera të Azisë duke firmosur kontratë për të vazhduar të luaj. Megjithate, nje enderr ngelet qe kur te kthehem ne Shqiperi, te jem pjese e kombetares shqiptare dhe te luaj me te ndeshje te ndryshme nderkombetare.

Suksese në këtë sport të ri për një shqiptar si ti këtu në Kine
Shumë faleminderit edhe juve për mundësinë që më dhatë për të bërë të njohur sportin e regby-së. //HermesNews ©2013// Na ndiqni dhe në Facebook dhe Twitter

Edison Myrteza

Dërgo me email | Stampo artikullin