29/08/2013 07:36:44

Profesioni nuk është politikë: Ardian Ymeri, drejtori pa komoditet

Intervistë me Kreun Spitalit Rajnal Shkodër. Rruga drejt ditëve më të mira, mbi të gjitha për pacientët

SHKODER - Spitali Rajonal i Shkodrës (foto), për kirurgun e njohur nga Shkodra Ardian Ymeri, 48, do të thotë shumë orë pagjumësi dhe sfida të përditshme, por kur njeriu kërkon medoemos t’i japë kuptim asaj që bën në punën e tij ditë më të mira vijnë gjithmonë. Kjo ndodhi dhe për të.

Pas stresit të ditëve të para, gjithçka filloi katër muaj më parë, kirurgu Ardian Ymeri sot kthehet më i qetë në zyrën e tij. Brenda saj një tavolinë e gjatë, në krye të së cilës qëndron prej katër muajsh një karrige bosh.

Ai është drejtori që nuk është ulur ende mbi të. "Nuk e ndjej të ulem në vendin e rehatshme të drejtorit, kur infermierët nuk kanë gjilpëra në duar", thotë ai.

Historia fillon para pak muajve dhe kur para syve pati një panoramë të mjerë të gjëndjes në spital: pa gjipëra dhe ilaçe. Ato ditë kuptoi se gjëja e parë që duhet të bënte ishte e thjeshtë dhe e ndershme. Ardian Ymeri përveshi mëngët, bashkë me kolegë dhe infermierë për të zgjidhur fillimisht problemet më praktike dhe banale të punës së përdishme.

Gjithçka nisi nga disiplina. Ymeri vendosi orare dhe filloi të mbledh stafin çdo ditë, për të bërë një resume për gjëndjen e ilaçeve, shpërndarjen e tyre, parregullsitë e punës dhe problemet që hasnin mjekët.

Mbi të gjitha për ndryshoi mënyra e punës që aplikohej deri atëherë. Administrata qe problem më vete sepse nuk ishte mësuar të punonte sistematikisht. Personeli largohej kur t’i tekej dhe kthehej kur t'i tekej gjithashtu. Edukimi me punën ishte një risi për ta dhe problem që duhej zgjidhur kirurgun. "Nisëm nga A-ja", thotë Ymeri.

"Stafi nuk është lëvizur, por kam filluar nga edukimin dhe trajnimi i tij", tha ai, “Kërcitën telefonatat sapo mora përsipër drejtimin e spitalit, por është tragjike t'i heqësh dikujt kafshatën e gojës. Prandaj mendova se këtë kaos dhe trysni duhej ta zgjidhja në formën më të përgjegjshme të mundshme. Zyrat brenda spitalit funksionin si lemza dhe nuk mbahej as orar, as inventar, as kërkohej shumë llogari për prezencën e stafit në punë,” thotë Ymeri.

Betejat me higjenen, ushqimin dhe ilaçet

Për kirurgun Ardian Ymeri është e rëndësishme të dëgjosh se çfarë problemesh ka stafi i tij që mblidhet çdo ditë me fillimin e orarit zyrtar të punës në orën 08:30. "Brenda ambjenteve të spitalit, nuk gjeta as detergjentë". thotë Ymeri. “Të mendosh që për një spital pastërtia është tejet e rëndësishme. Prandaj, kjo u fut në listën e gjërave për t'u bërë që në fillim.

Kuzhinierët e spitalit që gatuajnë për pacientët nuk ishin në lartësi me ushqimin që u servirnin. Nisi të kontrollonte mishin se nga vinte, të mbanin nën kontroll skadencën, qumështin se ku merrej dhe gatimin me higjenë në ambjentet e kuzhinës. "Kishte tetë vite që mishi nuk njihej në spital, dhe ushqimi ishte mizerabël", thotë Ymeri.

Ilaçet, janë një pikë e ndjeshme e pacienteve në spitalin e shkodrës. Pacientët ishte të detyruar të blinin ilaçe nëpër farmaci, për shkak se spitali nuk ofronte as më minimalet. "Më lejo të falenderoj miqtë e mi, nuk do të kisha bërë asgjë pa to", thotë kirurgu duke përmendur emrin e kryeinfermierit Halit Golemi dhe magazinierin Zija Muhija, mbi të gjitha për gatishmërinë që shfaqen për të qenë të ndershëm në punën e tyre.

Ftesës për të furnizuar me ilaçe spitalin iu përgjigjen dhe shumë OJF që sollën medikamente falas për të sëmurët kur t'iu duheshin. "Pas kësaj mund të merrnim frymë lirisht. Ilaçet në spital janë në duar të sigurta dhe nuk shiten, as nuk vidhen, janë aty për të sëmurët siç donim ", thote Ymeri.

Në këtë gjëndje patën dhe repartin e urgjencës. "Karburanti vidhej dhe shpenzohej pa hesap", thotë Ymeri. Ne vumë kontrollet dhe kërkuam llogari për shpenzimet që bëheshin, çfarë solli një rënie drastike të shpenzimeve që beheshin pa hesap vetëm për karburant. Një rreth i mirë bashkëpunëtorësh dhe orë pa gjumë, por që në fund patën rrezultat të dukshem dhe pse ai ka ende plane per spitalin.

Punë dhe formacion

Puna e përditshme ne spital shoqërohet dhe me formacion të vazhdueshëm të stafit. Drejtori i spitalit trajnon stafin e vet online. Një herë në javë ai zhvillon kurse formimi në distancë mbi etikën, problemet në punë dhe organizimin e orëve dhe punën në grup. "Një risi, duke parë nivelin e administratës ku ndodhej më përpara", thonë infermierët.

Trajnimi i vazhdueshëm nuk ndalet më kaq. Nëpërmjet telekonferencave mjekëve shkëmbejnë ide dhe projekte me kolegët në vende të ndryshme të botës si Europë (Austri, Francë, Itali) dhe në SHBA, e Kanada, apo dhe në kontinentë te tjera. Kjo i lejon ata të jenë në kontakt me njëri-tjetrin për t'u njohur me të rejat e fushës së mjekësisë, teoritë dhe praktikën. Nëpërmjet telekonferencave janë bere dhe operacione, thonë mjekët, ndërsa Ymeri shton se së shpejti do të trajtohet kanceri i prostates në telekonferencë, si një prej problemeve më të vona dhe më të mprehta me të cilën po haset mjekësia. "Ne po përgatitemi për këtë", thotë Ardian Ymeri.

Tenderimi. Pse të mos marrin pjesë mjekët ? Boll me buxhetin historik !

Tenderimi dhe pjesmarrja e mjekëve nëpër borde. Janë të gjitha probleme që duhen parë nga një pikëpamje tjetër. "Propozimi im është që në tenderime të marrin pjesë dhe mjekët", thotë Ymeri, për të rritur cilësinë e ilaçeve dhe për të hequr ato ilaçe që nuk mund të përdoren me (ilaçe te vjeteruara). Kjo bën që mjekët të kontribuojnë me dije të marra nëpër konferenca ndërkombëtare dhe shtete ku janë specializuar.

Kjo do të rrisë cilësinë e jetës së pacienteve. Rreth 5.000.000 milionë ishte fondi i akorduar nga Ministria për ilaçet. "Kjo do të thotë se duhet të ruajmë dhe majën e ages, siç themi ne", thotë kirurgu, i cili propozon për tenderat se, "mund të jenë me çmime më të ulëta dhe të bëhen nga bordi i mjekëve, të cilët janë të aftë të kërkojnë cilësi në marrjen e antibiotikëve". Ymeri pohon se "mjekët nuk kanë zë në kapitull", dhe shpreson se kjo do të ndryshojë. Ai ka shpresa dhe për ndryshimin e "buxhetit historik", siç e quan.

Kirurgu shkodran flet me ide të qarta për punën e tij dhe është i sigurt se "Privatizimi i hotelerisë brenda spitalit mund të rrisë cilësinë e shërbimit dhe të ushqimit për spitalin", thotë Ymeri teksa na shoqëron drejt asaj që për pacientët është dera e shpëtimit, magazina e ilaçeve.

E konsideron më të rëndësishme se zyra e vet. Kjo magazinë për shumëkënd ishte burim fitimi, por në gjithë këtë etje për para, pashë dhe njerez të përulur para qytetarëve me vetëdije se janë ne post për t’i shërbyer atyre dhe kjo, siç tha njëra prej prej infermierëve teksa zbret shkallët e spitalit, sepse "ka doktorë që besojnë në betimin e hipokratit", madje dhe kur përballen me ditë të zymta apo kur u duhet të lënë familjet për operacione të vështira natën vonë. Këta njerëz besojnë se profesioni nuk është politikë. Për ne gazetarët lajme të tilla quhen reklama, por unë besoj se njerëzit duhet t’a dinë se një portë e hapur dhe e sigurtë është një rrugë drejt mirëqënies dhe jetës. Në gjithë këtë pasiguri ''Made in Albania'' kjo duhet thënë. Na ndiqni dhe në Facebook

HermesNews - ©2013

Dërgo me email | Stampo artikullin