12/04/2013 14:26:59

Luljeta Nuzi, gruaja që u jep shpresa qytetarëve në Britani

Intervistë me drejtuesen e programit Shpresa

LONDER - “Asgjë nuk është e pamundur në jetë qoftë kjo në emigrim apo ne vendin tënd, fati është në duart e gjithsecilit nga ne. Mos prisni fuqi të magjishme që të vijë nga qielli, nga zoti, nga rastësia për të plotësuar ëndrrat tuaja, kërkojini këto fuqi tek vetja, energjitë tuaja, zemrat dhe mendjet tuaja”. – Këto fjalë nuk i ka thënë Margaret Thatcer por një grua shqiptare që i ngjan asaj për vendosmërinë dhe forcën që ka për t’i çuar gjërat deri në fund.

Luljeta Nuzi, drejtuesja e “Shpresa Programme” prej vitesh ka ndërmarrë reforma konkrete me projektet e saj për të ndihmuar shqiptarët në integrimin e tyre në Angli. Një grua e thjeshtë dhe plot energji që asnjëherë nuk përpiqet të jetë në qendër të vëmendjes pasi sipas saj “puna flet vetë”. Dhe puna që “Shpresa Programme” ka bërë gjithë këtë kohë ka folur aq shumë sa ka tërhequr vëmendjen e personaliteteve dhe institucioneve më të rëndësishme në UK. Në vitin 2006 asaj ju dha çmimi “Queens Award” nga vetë Mbretëresha Queens Elizabeth për t’u ndjekur më pas me çmime të njëpasnjëshme si Marrja e çmimit, bronz, gold dhe më pas “special distinction” për mësimdhënie gjatë viteve 2009-2012. Marrja e çmimit “Community of the year” në 2012, “Migrant women of the year” dhe “Peace Award” në 2012, etj.

Çfarë ju ka shtyrë të merrni vendimin për të emigruar në UK ?

Dëshira për një vend më të sigurtë, më të mirë dhe më me shumë mundësi më shtyu për të emigruar.

Kur vendoset të emigroni a e mendonit se do të bënit karriere dhe të arrini rezultate të tilla ?

Karriera nuk ka qenë kurrë një qëllim në vetvete për mua. Gjithmonë jam përpjekur, kam luftuar dhe punuar për të bëre më të mirën e mundshme për veten, familjen time dhe për këdo që kam pasur pranë. Kam mbaruar shkollën e lartë për inxhinieri elektrike, profesion që kur studioja mendoja se do ta ushtroja gjithë jetën time, po e vërteta është se ka mbi 10 vjet që po bëj një profesion krejt tjetër. A do të vazhdoj këtë profesion gjithë jetës time? Përgjigja ime është - Nuk e di!

Shumë gra e shohin të pamundur të gjejnë veten dhe pozicionin e tyre në një vend të huaj - ju si ja keni dalë ?

Ka shume njerëz, gra, burra, të rinj, të reja që nuk e gjejnë veten e tyre edhe në vendin ku kanë lindur jo me në një vend të huaj. Kjo ka te beje me pozicioni në shoqëri, me ëndrrat e gjithë secilit prej nesh , planet për të ardhmen qe kemi në momente të ndryshme të jetës. Shpesh ndalem dhe shikoj jetën time, ajo është krejt e thjeshtë e karakterizuar nga një qëndrim pozitiv ndaj saj, me një balancë për t’u admiruar e midis të shkuarës, të tashmes dhe të ardhmes dhe me rregulla krejt të thjeshta. Fokusohem në atë se si ta arrij qëllimin apo synimin që i ve vetes në atë moment dhe jo në atë se çfarë më pengon për të arritur qëllimet që i vë vetes. Gjithmonë kam shumë plane, të cilat janë një kombinim planesh afatshkurtra (mujore), afat mesme (vjetore deri në tre vjet) dhe afatgjata mbi tre vjet të cilat ecin paralel si shina treni. Suksesi i planeve afatshkurtra bëhet burim energjish për të kaluar tek ato afatmesme, dështimi bëhet mësim që duhet adresuar sa më shpejt të jetë e mundur dhe për ta kthyer në mësim dhe pozitivitet. Zgjedh të punoj me ata që janë të sinqertë dhe që japin maksimumin e tyre për të mirën e punës. Fokusohem dhe shpenzoj energjitë e mia me ata që e vlerësojnë punën që unë bëj, ata që më kritikojnë në mënyrë konstruktive. Dënimi më i madh është ai që iu jap atyre që gënjejnë, shpifin ose xhelozojnë - i fal dhe nuk harxhoj kohën time të çmuar duke folur për ta ose menduar pse e bëjnë një gjë të tillë. Ofroj ndihmë, këshillime, kohë tek të gjithë ata që me kërkojnë një gjë të tillë ose që unë kuptoj se kanë nevojë për ndihmë pa pritur asgjë prej tyre si shpërblim. Punoj shumë, shikoj te maksimizoj efektet e punës, synoj dhe punoj për të dhëne më të mirën e mundshme, shpesh duke sakrifikuar veten( kohën time të lirë, gjumin etj)

Si ka lindur "Shpresa Programme"? Dhe përse e keni quajtur "Shpresa" ?

Shpresa Programme ka lindur si një nevojë e brendshme për të gjetur zgjidhje te shumë problemeve me të cilat familja ime dhe shumë familje të tjera po përballeshin në vitet e para të emigrimit këtu në Angli. Si psh fillimisht orientimi, gjetja e shërbimeve që ofroheshin për të gjithë ne si ndihma sociale, shkollimi, përgjegjësitë dhe të drejtat ligjore si qytetar, e më pas integrimi me dinjitet, mësimi i gjuhës shqipe për fëmijët dhe të rinjtë, promovimi i kulturës shqiptare, krijimi i një imazhi pozitiv për komunitetin tonë, punësimi, të qenit aktiv në komunitetin lokal dhe më gjerë, luftimi i padrejtësive. Nuk e kam quajtur unë shpresa, në nëntor të 2002 më se 120 veta morën pjesë ne themelimin e kësaj organizate dhe e quajtëm Shpresa, si emrin më të përshtatshëm për të reflektuar çfarë të gjithë dëshironim ky institucion të bëhej, një burim shprese për të gjithë ata që do të binin në kontakt me të. Një institucion që do të kthente besimin tek institucionet

Cilat janë arritjet me të mëdha që ju keni shënuar me "Shpresa Programe"

Krijim si Compani në 2003. Marrja e zyrës së parë në janar të 2003. Punësimi i tre Punonjësve në vitin 2004. Pjesëmarrja ime në pritjen e shtruar në No10 nga ish kryeministri Z. Tony Blair për punën e bërë në komunitet dhe rolin aktiv që kishte luajtur Shpresa në 2004 dhe 2006
Marrja e çmimit prestigjioz në 2006: “Queens Award “ të dhënë nga vetë Mbreteresha Queens Elizabeth. Ftesa e të gjithë stafit, nga Mbreteresha në pritjen e mbajtur në Buckingham Palace në vitin 2006, e 2 anëtarëve të boardit drejtues në 2007 dhe më pas e imja në 2008. Marrja e godinës 3 katërshe, 11 zyra dhe 3 dhoma trajnimi në 2007.

Mbajtja e eventit në parlamentin Anglez publikimi i raportit mbi impaktin e punës së “Shpresa programme” prej 7 viteve në 2009. Marrja e çmimit «Community of health” në 2008 e cila u rinovua përsëri në 2012 për tre vite të tjera. Marrja e çmimit, bronz, gold dhe më pas special distinction për mësimdhënie gjatë viteve 2009-2012. Marrja e çmimit “Community of the year” në 2012, “Migrant women of the year 2012”, “peace award” 2012
Marrja e çmimit “ekspert in volunteering” in 2013.

Shpresa tashmë ofron një nga modelet më efikase të punës për integrimin e komuniteteve duke kombinuar punën në bashkëpunim me” can do attitude” dhe përkushtim Çdo jave nga shërbimet e saj përfitojnë mbi 600 njerëz, mbi 50 ofrojnë punë vullnetare në shkolla të ndryshme dhe komuna të ndryshme të Londres. Për me tepër lexo në www.shpresaprogramme.com.

Shume njerëz të suksesshëm kanë sekretet dhe strategjitë e tyre - si ka qenë në rastin tuaj? Keni diçka për të ndarë me ne ?

Nuk mendoj se kam sekrete apo strategji por kam disa parime shumë të thjeshta. Dëgjoj shumë, fol pak, kupto, vepro. Fokusohu në ndryshimin që do të sjellësh me punën tënde dhe jo ne atë çfarë do të mendojnë të tjerët për të. Punën e sotme kurrë mos e lër për nesër. Nuk ka asgjë të paarritshme. Të gjithë ata që kanë kontribuar sadopak në suksesin tënd lejoji të jenë pjesë e këtij suksesi me pak fjale ji mirenjohese. Përdor të shkuarën për të mësuar, të tashmen për të jetuar, të ardhmen për t’u përsosur. Humbjet ktheji në mësim jo pendim

Tani mbas kaq vite ku arritjet e tua shënojnë pikun, cfarë ju ka mbetur akoma pa realizuar ?

Shpresa është bëre një institucion i cili merret si modeli më i mirë në komunitet përfshirë punën në partneritet, ofrojmë kualitetin maksimal, eshte insitucioni ku njerezit besojne. Kemi akoma shumë për të bërë : çdo vit ne dëgjojmë për 2 muaj me radhë çfarë përdoruesit duan që “Shpresa” të ofrojë për ta. Qëllimi i “Shpresës” është që anëtarët e komunitetit tonë të kenë mundësi të marrin të gjithë shërbimet për të cilat ata kanë nevojë. Këtë e bëjmë në dy mënyra, e para duke krijuar lidhje mes përdoruesve në nevojë me institucionet përkatëse dhe duke edukuar të dyja palët si të arrijnë të kuptojnë dhe ndihmojnë njëri tjetrin, psh vite më parë ne filluam një program për të adresuar shëndetin mendor të grave shqiptare, së pari gjetëm se çfarë i pengonte ato të përdorin shërbime të cilat ishin në offer, më pas përzgjodhëm një institucion që ishte shumë i përafërt me mënyrën e punes se “Shpresës” dhe i ndihmuam ata qe të krijonin besim dhe te përmirësonin mënyrën e punës duke i këshilluar që të punësonin një terapiste shqiptare, të ofronin shpenzimet e transportit për ato gra të cilat nuk mund të udhëtonin, si edhe të krijonin mundësi për childcare. Tashmë ky projekt ka mbaruar dhe shërbimi vazhdon të ofrohet nga Women’s Therapy centre. Tashmë po fillojmë të adresojmë dhunën në familje, sapo kemi zgjedhur organizatën partnere dhe po kërkojmë mundësitë financiare që të ofrojmë shërbimin që duam

Projekti për mësimin e gjuhës shqipe. Projekti tjetër tek i cili kemi për më tepër se 5 vjet që po punojmë është gjetja e një kualifikimi për mësimin e gjuhës shqipe. Vetëm vjet në Nëntor ne kemi marrë dritën jeshile dhe na është kërkuar diçka konkrete për ta bërë realitet këtë ëndërr të të rinjve shqiptarë. Ne si komunitet duhet të gjejmë £100000 për të regjistruar gjuhën shqipe si GCSE. Çfarë nënkupton kjo është se të gjithë të rinjtë e moshës 14-16 vjeçare do të kenë mundësi ta mësojnë gjuhën shqipe nëpër shkollat e tyre dhe ta japin provim, rezultatet e të cilit njihen nga Universiteete kety ne Angli. Kjo bën të mundur që ky shërbim kaq i rëndësishëm për mbrojtjen e gjuhës e kulturës tonë të jetë i mundshëm në te gjithë shkollat angleze.
Sic e permenda edhe pak me lart projekti i mesimi plotesues tek shpresa ka marra cmimin me te lart ne Mbreterine e Bashkuar te quajtur “Special disctintion” te cilin e kane marre vetem 5 shkolla midis te pakten 3000 te tillave qe jane ne MB. Per modelin e punes shume efikas dhe reputacionit te krijuar ne tashme ndihmojmë që komunitete të tjera të trajnohen nga ne dhe të replikojnë modelin tonë.

Ç’mund të na thoni diçka për Luljetën si nënë - a jeni e kënaqur ?

Te jesh nënë, prind është ndjesia më e bukur në botë. Të menaxhosh planet qe çdo nënë thur për fëmine e saj, të pranosh me pozivitet zgjedhjet që fëmijët bëjnë kur ato nuk përputhen me planet e prindërve , t’i duash ata pa kushte dhe çdo sekond dhe të jesh aty sa herë ata kanë nevojë për ty, të kafshosh gjuhen sa herë qe do të doje t’i urdhëroje që ata të ndjekin verbërisht urdhrat e tua, planet që ti ke bërë për ta si prind jane sfida. Kam punuar shumë me veten dhe punoj qe te jem nje degjuese e mire, te fitoj besimin e tyre qe ata te vijne tek une per cdo gje qofte gezim apo problem.Sot Deni, Daniel dhe Kevin janë shokët e mi, kolegët e mi të vegjël, pasqyra ime. Ata janë barometri që më tregon mua se kohet kanë ndryshuar dhe se e kaluara ime nuk mund të jetë tashmja e tyre. Suksesi i tyre, lumturia e tyre janë dehja ime, gëzimi im.

Cilat janë projektet tuaja në të ardhmen ?

Më pëlqen shumë historia e Jack Petchey-it, një njeri që nga pa pune është bërë shumë i pasur dhe ka ngritur një fondacion ku sponsorizon me mijëra të rinj çdo vit që të bëhen leaders. Do të doja shumë që të kisha mundësi t’a bëja një gjë të tillë pas 20 vitesh. Dhe më pas të krijoja një projekt që ofronte ndihme mjeksore falas , vizita etc falas për njerezit qe kishin semundjen e kancerit në te gjithë fshatrat e Shqipërise dhe Kosovës si dhe ofronte projekte informimi dhe edukimi rreth tyre. Ajo që dua më shumë në këtë moment është të bëj të mundur realizimin e enderres se te rinjve shqiptar me te cilet kam punuar per me shume se 5 vjet ;Rregjistrimin e gjuhes shqipe si IGCSE, nga Cambringe insitute. Tashme e vetmja gje qe na ka mbetur eshte sigurimi i £100.000 që janë financat që Cambridige Institute na ka kërkuar për të bërë të mundur zhvillimin e librave dhe metodikave, si edhe për provimet e gjuhës shqipe këtu në MB. Dhe me kete gjuha jone e bukur shqipe do te jepet ne shkollat Angleze si gjuhe e huaj.

Cili është mesazhi që i përcillni të gjitha grave shqiptare kudo që janë në emigrim apo në vendin e tyre ?

Asgjë nuk është e pamundur në jetë qoftë kjo në emigrim apo ne vendin tënd, fati është në duart e gjithsecilit nga ne. Mos prisni fuqi të magjishme që të vijë nga qielli, nga zoti, nga rastësia për të plotësuar ëndrrat tuaja, kërkojini këto fuqi tek vetja, energjitë e juaja, zemrat dhe mendjet tuaja.
Punoni fort per t’i arritur synimet tuaja. Mos lini asnje t’u thote se ju nuk mundeni. Zgjidhe shokun më të mirë se vetja dhe kurrë mos rezervo ndihmën për ata që kanë nevojë për të. //HermesNews - ©2013//

Intervistoi Flutura Zhuta

Dërgo me email | Stampo artikullin