19/03/2013 10:44:18

Vota e qytetarëve jashtë. Prespektiva e Lëvizjes 5 YJET në Shqipëri

Lëvizja 5 YJET e cila është inauguruar në Romë, së shpejti dhe në Shqipëri. Pse lindi dhe ambjenti që gjen në Shqipëri në skemat e ngjashme mes partive që janë 'të destinuara të dështojnë'. Flet kreu i Lëvizjes Vladimir Kosturi...

Ku e mbështesni optimizmin që ka Lëvizja 5 YJET ?

Fjala e Beppe Grillos ka qenë se lëvizja italiane 5 YJET do të ndryshonte botën dhe jam i sigurtë, që Shqipëria do të përfshihet nga kjo furtunë. Që lëvizja shqiptare 5 YJET të lindë, kërkohen dy kushte themelore - pakënaqësia ndaj kastës politke shqiptare dhe një individ, që nuk ka të bëjë me kastat, i aftë për ta udhëhequr këtë ndryshim. Kushtin e parë Shqipëria e plotëson më së miri dhe për faktin se distanca midis politikës dhe qytetarit në Shqipëri është dhe më e madhe, por dhe korrupsioni e favorizon pakënaqësinë dhe mosbesimin tek klasa e kastës. Sa për një individ të aftë, që të çojë përpara këtë proçes, në Shqipëri mungon, sepse këto 20 vjet politika e lëvizjeve jo partiake jashtë institucionale ka munguar në mënyrë absolute. Ky individ nuk mund të formohet për një kohë të shkurtër dhe në mënyrë artificiale thjesht duke kopjuar skemat politike të huaja. Por ky individ egziston jashtë Shqipërisë dhe nuk mund të konsiderohet mburrje, në rast se e them me vendosmëri që jam unë Beppe Grillo shqiptar. Kur televizioni në Shqipëri me intervistoi si "Beppe Grillo shqiptar" nuk e bëri me kërkesën time, por sepse kastat politike dhe mediatike janë shumë të njohura me atë që ka bërë shoqata Iliria, por me qëllim e kanë censuruar. Unë Beppe Grillon e kam bërë për gati 20 vjet dhe gjithmonë shqiptarët më kanë kritikuar pse isha kundër të gjithëve. Ne i kemi mbushur sheshet dhe rrugët e Italisë, në veçanti ato të Romës me qindra herë, por fakti që në Shqipëri njihemi pak prej masës së popullit i detyrohet thjesht çensurës që kasta ka aktivuar ndaj nesh prej frikës se populli një ditë do të zgjohej. Por ajo ditë tashmë erdhi. Emigrantët na njohin konkretisht dhe jo nëpërmjet televizionit, por dhe në Shqipëri nuk janë të paktë ata që kanë simpati për atë që ne kemi bërë për 20 vjet me radhë. Bërthama për të aktivuar Lëvizjen ''5 YJET" në Tiranë ekziston dhe pse për momentin është e padukshme. Ne numërojmë me mijëra shqiptarë, që sot banojnë në Tiranë dhe që e njohin dhe kanë qenë aktive në manifestimet tona të vazhdueshme në Itali. Kësaj bërthame dalëngadalë do t'i bashkohet populli i tërë.

Si mendoni të orientoni qytetarët (në Shqipëri), drejt programit tuaj, duke qenë se keni mbledhur rreth vetes, qytetarë që jetojnë kryesisht jashtë vendit ?

E thashë dhe më sipër se në Shqipëri ka edhe emigrantë që janë kthyer dhe që e dinë se ne kemi luftuar pa financime dhe me ndershmëri. Njohin dhe faktin që lufta jonë ka patur rezultate. Kohët e fundit njerëzit e morën vesh, se shqiptarët arritën të fitojnë mbi padrejtesinë italiane, duke liruar nga burgu dhe duke i dhënë pafajësinë e plotë Nexhip Qepit (akuza pedofili kundrejt djalit te tij të vogël), e arritën nëpërmjet një lëvizjeje me natyrë grilline, që kundërshton kastat pa dallim, por se si u ndërtua dhe si u udhëhoq kjo luftë nuk u informuan për shkak të censurës mediatike. Fakti, që lëvizja "5 YJET" lind në Rome është shumë pozitiv, sepse ka natyrshmërinë e saj jashtë kopjimeve, të cilat të çojnë në dështim. Ne jemi kalitur për 20 vjet nëpër sheshe, kemi dhënë prova, se refuzojmë korrupsionin dhe jemi të ndershëm. Shqiptarët me banim në Shqipëri do të na mirëpresin, sepse në jemi shqiptarë, kemi mbajtur Shqipërinë, ne nuk jemi të huaj, por kastat politike na kanë bërë të ndjehemi të huaj në vendin tonë. Por tashmë familjarët tanë në Shqipëri e kanë kuptuar lojën e përçarjas që kastat politike kanë arkitektuar për 22 vjet me radhë. Ne nuk jemi fare të panjohur për popullin e Tiranës, sepse kemi ardhur dhe nga Roma, të shkojmë atje dhe të organizojmë protesta kundër padrejtësive dhe krimit shtetëror.

Cili është qëllimi që keni në këto zgjedhje ?

Koha është shumë e shkurtër për të caktuar objektiva, kur në Shqipëri kastat e partive politike kanë blinduar gjithçka dhe janë shumë agresivë kur mendojnë se një ditë pushteti do t'ju ikë nga duart. Ne do të shohim reagimin e populit të Tiranës në 2 Prill, ku dhe kemi lënë takimin e parë prej orës 17 deri 21 tek parku Rinia. Kemi thjesht vështirësi teknike organizative, sepse simpatinë e njerëzve arrijmë të fitojmë shumë shpejt. Ne rrezatojmë tek njerëzit forcë, besim, guxim kundër padrejtësive, por mbi të gjitha populli e përcepton shumë shpejt kur i bën gjërat me zemër dhe nuk reciton vjersha se ta do kolltuku dhe interesi personal. Në Dhjetor 2012, më ka bërë përshtypje tek parku Rinia, nisa një manifestim me tre veta dhe u grumbulluan me qindra, të cilët duartrokisnin në mënyrë spontane. Lexoja në fytyrat e tyre një urrejtje për të gjithë politikanët dhe një dëshirë për t'u çliruar. Vija re edhe policinë, e cila ishte shume e preokupuar se mos grumbulloheshin njerëz dhe jepte sinjale për devijim të kalimtarëve. Njerëzit në Shqipëri tashmë e duan këtë çlirim dhe nuk mund ta frenojnë. Alternativat si Bamir Topi, Kreshnik Spahiu, janë të dështuara pa lindur, edhe pse duket sikur grumbullojnë njerëz, por skemat janë të ngjashme, ku populli vihet në resht dhe udhëheqësit me makina lluksoze me gratë përkrah me bythet me silikon të vihen në krye. Njerëzit tashmë janë të lodhur prej këtyre skemave politike të dështuara.

Thoni se kërkoni të hiqni provimin për në Universitete. Mendoni se kjo do të ndikojë në cilësinë e institucioneve ?

Unë jam pedagog fizike dhe kontaktin me shkollën e kam patur intensiv. Provimet e pranimit në universite janë thjeshtë mënyrë seleksionimi absurde për të favorizuar fëmijët e kastave dhe njerëzit e pasur. Mjafton diploma e shkollës së mesme për të kuptuar nivelin e një studenti. Unë jam kundër kufizimit të së drejtës së studimit në Universitet. Nuk duhet të këtë fakultete me numër të kufizuar, e diktuar kjo prej lobeve të kastave. E drejta e studimit duhet të jetë për të gjithë dhe seleksionimi të bëhet ne kërkesat për cilësinë e shkollës. Të vlerësohet më i afti mbi bazën e rezultateve që arrin dhe të ashpërsohet ligji mbi korrupsionin në universitete.

Deri ku keni arritur, në përpjekjet tuaja për sigurimin e votë së emigrantëve ?

Nuk ekziston një shtet në botë që të mohojë votën e 40% të zgjedhësve siç është Shqipëria. Per demagogji bëjnë sikur vijnë për të takuar emigrantët, natyrisht duke organizuar nëpër takime, të afërmit, fëmijët, nipërit e tyre. Politika shqiptare e këtyre 22 vjeteve ka qenë e hapur kundër emigrantëve. Të gjitha qeveritë pa dallim kanë nëshkruar marrëveshje me shtetet europiane kundër emigrantëve. Për shkak të këtyre marëveshjeve kanë mohuar dhe të drejten e votës. Partitë politike shqiptare e kanë parë emigrantin thjesht si ushqim për të mbushur xhepat e tyre dhe janë të gjitha pa dallim bashkëfajtorë të humbjes së mjaft jetëve njerëzish në det apo në malet e Greqisë. Ata e dinë, se prej emigrantëve urrehen dhe për këtë kanë qenë dhe janë kundër të drejtës së votës. Mendoj se e drejta e votës për emigrantët dhe largimi i kastave politike nga pushteti janë të lidhura... Nuk mund të jepet e drejta e votës me këto kasta dhe kastat nuk mund të largohen pa presionin e emigrantëve. Vështirësia jonë është thjeshtë sepse jemi larg njëri/tjetrit dhe Shqipërisë, por një bashkim i emigrantëve do ta fshinte kastën e partive me shumë shpejëesi. Gjatë gjithë muajit Prill, do të organizojmë tubime, ku do të refuzojmë që zgjedhjet të zhvillohen pa pjesëmarrjen e pjesës më aktive, që janë emigrantët.

Cili është ndryshimi ndërmjet pakënaqësisë që kanë qytetarët brenda Shqipërisë dhe atyre që jetojnë jashtë saj ?

Shqiptarët që jetojnë në Shqipëri për të mbijetuar, i janë përshtatur sistemit politik kriminal të këtyre 22 vjetëve. Më kujtohet, që kur flisja në Tiranë për shqiptarin e burgosur padrejtësisht për pedofili, dëgjoja pëshpëritje se "ne kemi halle më të mëdha...". Në Shqipëri vrasja e njerëzve prej shtetit apo prej krimit ordiner nuk përbën me ndonjë lajm.... Lajmi për vrasjen e ndonjë polici ndofta sjlell me shumë preokupacion, ndërsa për humbje jetësh të qytetarëve të thjeshtë duket sikur nuk shqetësohet me njeri. Unë personalisht ndjehem i fyer për faktin që në Shqipëri pas katër vrasjeve në protestën e 21 Janarit 2011, ditën e dytë asnjë nuk protestoi. Kjo nuk ka precedent në historinë e asnjë populli. Ne emigrantët jemi më të ndjeshëm, sepse shohim se këtu kur policia italiane ka vrarë dikë, populli është ngritur i tëri në këmbë kundër shtetit pa dallime partiake. Kjo është dhe vështirësia në Shqipëri. Njerëzit u mësuan me këtë lloj shtypje dhe gradualisht e pranojnë pa bërë rezistencë. Eshtë njëlloj si të mësohesh me një sëmundje të gjatë dhe të pa shërueshme... Për këtë unë kam besim se familjarët tanë në Shqipëri do të na mbeshtesin, sepse kanë shumë të vështirë të çlirohen pa një ndërhyrje nga jashtë. Për fat këtë radhë këta që do të ndërhyjnë nuk janë invazorë të huaj, por bij të Shqipërisë që ju dhemb shpirti dhe duan t'i thonë STOP KASTAVE POLITIKE që na sollën në këtë ditë.

Intervistoi Doriana Metollari

Dërgo me email | Stampo artikullin