06/02/2013 00:07:40

Zona (OnLine) tranzit e gazetarisë dhe politikës: po zëdhënësat ?

Arrijmë t'a parashikojmë se ku po shkon gazetaria sot ? Shërbejnë më mjetet standarte të komunikimit të politikanëve me qytetarët dhe si ndikojnë në elektorat kandidatët gazetarë për deputet ? Eksperti i fushës së marrëdhënieve publike me eksperienca në disa institucione si Kuvendi i Shqipërisë, Ministria e Jashtme, Prokuroria e Përgjithshme dhe Ministria e Drejtësisë Prof. Agim Neza i është përgjigjur pyetjeve të lexuesve të HermesNews Online. A do të zhvendoset beteja për zgjedhjet e 23 Qershorit në rrjetet sociale ? Për gazetarinë shqiptare do të ishte fillimi i një kapitulli të ri. Po zëdhenesat, do të kenë me lajme ? Më poshtë intervista e plotë e analistit Agim Neza...

HermesNews/Online - Cili është ndryshimi ndërmjet të qënit zëdhënës për shtyp në Ministri/ Prokurori/ Parlament ?

Në radhë të parë roli i zëdhënësit apo përfaqësuesit të marrëdhënieve publike është shumë i rëndësishëm për të informuar median dhe opinionin publik. Pavarësisht se ata (përfaqësuesi i marëdhënieve publike dhe zëdhënësi) janë avokat të institucionit apo klientit tek kompanitë private nuk duhet të harrojnë se duke i shërbyer interesit publik ata/ato i kanë shërbyer më mirë interesave të institucioneve publike apo kompanive private. Në këtë kuadër duhet kuptuar se roli i zëdhënësit qoftë në Ministri, Prokurori, Parlament në radhë të parë duhet të jetë në funksion të interesit publik. Përsa i përket ndryshimit të tre institucionet kanë specifikat e tyre. Pra ndryshe janë problematikat në ministri, ndryshe në prokurori dhe ndryshe në parlament, por qëllimi është i përbashkët; informim i shpejtë dhe i saktë i këtyre institucioneve në lidhje me ato tema dhe problematika që ka interes media dhe opinioni publik.

A është gati Shqipëria të informohet online ?

Mendoj se është punuar dhe ka arritje në këtë drejtim, por mbetet shumë për të bërë në zonat rurale.

Gazetaria po kalon një fazë tranziti nga tradicionalja, online ? Si po e përjeton këtë opinioni publik ?

Ky kalim është shumë i ndjeshëm jo vetëm për qytetarët, por është bërë i ndjeshëm dhe për politikanët. Ka shumë debate në këtë drejtim, disa mendojnë se gazetaria tradicionale po dobësohet, ndërsa unë mendoj se të dyja janë shumë të rëndësishme dhe opinioni publik do të ketë interes si për gazetarinë tradicionale dhe atë online. Komunikimi online ka një gjë të veçantë se përcjell informacionin më shpejt dhe krijon hapësira për komunikim për çdonjërin në veçanti në rastet e komunikimit midis politikanëve me qytetarët.

Si e vlerëson përfshirjen e politikës në rrjetet sociale në këtë fushatë. Do të influencojë shumë votimet ?

Fakti që politikanët janë angazhuar kohët e fundit në rrjetet sociale tregon se politika i konsideron rrjetet sociale jo vetëm si mundësi komunikimi me opinionin publik, por dhe si alternativë për të shpalosur alternativat e tyre me qëllim rritjen e numrit të votuesve për partite përkatëse. Gjithashtu politikanët, në veçanti deputet të PD dhe PS, nëpërmjet komunikimit në twitter, facebook, etj po përpiqen jo vetem të komunikojnë me opnionin publik, por dhe të bindin liderët e tyre në veçanti Berishen dhe Ramen se vizioni dhe prioritetet e deputeteve apo kandidateve për deputet është në të njëjtën linjë zanore dhe në mbështetje të politikave të këtyre liderëve. Nëse i hidhet një këndvështrim të facebook-ve të deputeteve të dy partive herë pas here ata përcjellin të njëjtin mesazh që kanë përcjellur dhe liderët e tyre, duke i bashkangjitur edhe foton e liderit. Kjo për faktin se dy liderët e partive Berisha dhe Rama i kanë bërë këto rrjete sociale si mjetet më të mira komunikuese për të shprehur mesazhet e tyre. Natyrisht, kjo mënyrë komunikimi nëpërmjet rrjeteve sociale do të influencojë disi në votime. Por, për mendimin tim liderët e këtyre partive nuk duhet të harrojnë komunikimin me median nëpërmjet konferencave për shtyp, deklaratat për shtyp, përcjelljen e mesazheve aty ku ndodhet elektorati, pra pranë komunitetit. Ky argument, më bind kur shikoj mjetet sociale të liderëve të PS dhe PD ku klikimi i "like" dhe komentet jepen kryesisht nga simpatizantet e partive përkatëse, pra janë të njëjtet emra që klikojnë apo bëjnë komente. Tradita e marrëdhënieve publike qoftë në Europë apo SHBA, në veçanti gjatë fushatave ka treguar se një gërshëtim i konferencave për shtyp, deklaratat për lajm, etj. me rrjetet sociale do të jetë shumë me rezultative dhe më efikase, pra jo vetëm ti "jap një dorë", por ti "jap shumë duar", që nënkupton me shumë vota gjatë zgjedhjeve.

Keni qenë gjithnjë zëdhënës në Ministrinë e Drejtesisë, në Prokurtorinë e Përgjithshme, Kuvend etj. Sa i pavarur ndjehesh duke ditur gjitha të fshehtat e këtyre institucioneve ?

Në Kuvendin e Shqipërisë nuk kam qenë zëdhënës, kam qenë Këshilltar i Kryetares së Kuvendit, Znj, Jozefina Coba Topalli, ku në konceptin tim Kuvendi i Shqipërisë është "shtëpia e të gjithëve", qofshin të majtë, të djathtë, etj. Puna në Kuvendin e Shqipërisë mbetet një eksperiencë veçantë. Mendoj se Drejtoria e Marrëdhënieve me Publikun në Kuvendin e Shqipërisë është një shembull i veçantë pozitiv për të gjithë institucionet e tjera se si duhet të funksionojnë marrëdhëniet me publikun. Në lidhje se sa ndjehem i pavarur ? Mendoj se jam i pavarur gjer në këto moment, por përgjigjen më të mirë mund ta japin gazetarët dhe opinioini publik me të cilët kam patur gjithmonë kënaqësinë për të komunikuar si dhe për të përcjellë mesazhe apo për të marrë mesazhe prej tyre se si mund të jemi më eficent në komunikimin me njeri-tjetrin.

Hyrja e gazetarëve në politikë për disa quhet vlerë, për të tjerët kompromentuese për punën e mëparshme si gazetare. Ju si do i vlerësoni këto kalime nga media në politike ?

Vlerësoj mendimin e krerëve të politikës shqiptare për të përfshirë në politikë gazetarët. Me humor mund të them se të paktën, fjalimet nuk do të kenë më nevojë t'ua përgatis kryetari... Nga natyra gazetarët janë më kërkues për të bërë më të mirën për qytetarët dhe eksperienca ka treguar se ata nuk janë "Yes man" për kryetarët e partive. Mendoj se eksperienca ka treguar se gazetarët që janë përfshirë në politikë kanë sjellë risi për politikën dhe kanë krijuar besim tek opinioni publik për trajtimin e problematikave jo vetëm me guxim por dhe me fakte, qoftë në Parlament apo në debatet televizive. Për të qenë më konkret për Hermesnews, deputetët e ardhur nga gazetaria si Erjon Braçe, Astrit Patozi, Sokol Olldashi, Ben Blushi, Mark Marku, Edi Paloka për hir të së vërtetës janë shumë më lart në përfaqësimin e elektoratit sesa deputë të tjerë të cilëve nuk iu dëgjohet zëri asnjëherë në parlament, ku gjuha dhe argumenti i tyre përfaqësohen vetëm nëpërmjet kartonit. Do të ishte me interes për shoqërinë që kryetarët e partive të angazhonin sa më shumë gazetarë dhe analistë në "kampet" e tyre. Kjo do t'i ndihmonte me shumë zhvillimit të shoqërisë dhe trajtimit dhe zgjidhjes së problemeve me të cilat ndeshet qytetari çdo ditë qofshin këto çështje ekonomike, apo çeshtje që kanë të bëjnë me drejtësinë.

Plani më i afërt që keni ?

Plani më i afërt, Pedagog i Marëdhënieve Publike pranë studentëve. Të tjera plane po i mendojmë...



* Hermesnews©AllRightsReserved
Çdo riprodhim i paautorizuar ndëshkohet sipas ligjeve në fuqi

Intervistoi Doriana Metollari

Dërgo me email | Stampo artikullin