01/03/2014 09:28:31

Kthim në traditë !

nga Brunhilda Çela

Sekretet e aromave të Brunhildës Receta: për një tepsi të thellë me diametër 35 cm:
kadaif të fresket 500 gr, gjalpë të tretur rreth 200-250 gr, arra të qëruara të grira ashpër rreth 400 gr.

Për shërbetin duhet: 600 gr sheqer, 450 ml ujë, lëngu i një limoni dhe lëkura e një limoni, 1 bishtaje vaniljeje, 1 limon i prerë në feta.

Për kremin: 8 të verdha veze, 150-200 gr sheqer (varet sa të ëmbël e doni),
1 l qumësht, 100 gr niseshte, 1 bishtaje vaniljeje, lëkura e dy limonave lëkurë trashë (limona shume aromatik) dhe pak liker limoni rreth 1 gotë rakie (limoncello).

Përgatija: kadaifin e freskët e hapim me dorë që të shkrifërohet. Hedhim aty gjalpin e tretur dhe arrat, (unë i vura dhe lëkura limoni me sheqer, ishin lëkurat që mbaj në vazo me sheqer kur bëra glikone e limonit), përziejmë me dorë dhe e ndajmë në dy tepsi me diameter 35 cm.

I pjek të dyja në proçesin me ventilator në temp. 120-130 gradë rreth 2 orë e gjysëm zgjati pjekja, kadaifi nuk digjet po merr një ngjyrë të artë të bukur dhe ndihet shumë aroma e gjalpit dhe arrave të pjekura.

Ndërkohë që kadaifi u poq, bëra shërbetin duke i zier sheqerin me ujin, hap një bishtajë vaniljeje e kruaj me thike tulin e saj e hedh tek sherbeti bashkë me bishtajën, i ziejmë rreth 15 minuta dhe në fund e heqim nga zjarri, shtojmë lëngun e limonit dhe lëkurat e tij. E lëmë të ftohet.

Për kremin vura qumështin të ngrohet dhe e lë të marrë një valë të lehtë jo me furi e nxeh ne temperaturë të ulët. Tek qumështi vura një sheqer vaniljeje me aromë bishtaje të vërtetë jo vanilje artificiale, dhe tulin e një bishtaje dhe bishtajen. Kjo i jep aromën karakteristike të vaniljes së qumështit.

Në një tas të thellë rrahim me mikser të verdhat e vezëve me sheqerin sa bëhen shkumë, aty hedhim dhe niseshtenë dhe vazhdojmë rrahjen.

Pastaj hedhim me terezi qumështin e ngrohtë duke vazhduar rrahjen me mikser. Qumështit ia kemi larguar bishtajen e vaniljes. Përziejmë masën dhe e kalojmë në një site guzhine.

Në një tenxhere vëmë ujin të valojë dhe në një tas inox shtoj përzierjen qumësht - vezë. Këtë tas e vë mbi ujë të valuar dhe e përziej gjithë kohës derisa kremi bëhet plotësisht i trashë e krijon flluska.


Mund ta vini dhe direkt të trashët kremi mbi sobë në nxehtësi mesatare por në banjë - mari është metoda më e sigurtë që mos t'ju pritet kremi apo të fillojë të krijojë kokrriza.

Pasi kremi është bëre ia hedhim dhe lëkurat e dy limonave dhe një gotë rakie limoncello (liker limoni). Kadaifit të nxehtë ia hedhim shërbetin (e ndajmë shërbetin në dy pjesë të barabarta) dhe e lëmë ta pijë plotësisht.

Kremin e mbuloj me një folie plastike që të mos krijojë kore. Pasi është ftohur e rrahim me mikser dhe kremi bëhet shumë i mirë. Mund ta përziejmë me pak krem pana të rrahur por unë nuk e bëra se del më i rëndë kadaifi ka plot gjalpë e shërbet e kremi e balancon pasi del më i lehtë dhe jo shumë i ëmbël.

Tek njëra tepsi ku kemi shtresën e kadaifit hedhim kremin, përmbysim edhe pjesën tjetër të kadaifit mbi kremin. Lini pak krem dhe mbusheni në një qeskë pasticieri për ta zbukuruar pak lart me krem tepsinë. E vini në frigorifer dhe lëreni të mpikset mirë përpara se ta prisni në copa dhe ta servirni.
Ju bëftë mirë nëse e provoni ! Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin