18/08/2013 07:47:32

Tortë me pjeshkë

nga Brunhilda Çela

Sekretet e aromave të Brunhildës Këtu po ndaj me ju një recetë torte që e kam bërë vjet në këtë periudhë me një pandispanjë të hollë. Kremin e kam bërë me kos. Mendova meqë e Diel sot, këto fruta e kanë akoma sezionin nëse ndonjë amvisë kërkon një recetë ëmbëlsire të lehtë kjo do ishte shumë e mirë.

Për këtë tortë unë në fillim bëra pandispanjën të hollë me 3 vezë, 3 lugë sheqer, 3 lugë miell, 1 lugë niseshte dhe 1 lugë vaj, lëkurë limoni e pak farë pluhur pjekës 1 majë lugë kafeje.

Rraha vezët mirë me sheqerin sa u bënë shkumë të bardhat, shtova, të verdhat, vajin dhe vazhdova rrahjen, pastaj përzieva miellin me niseshtenë dhe me pluhurin pjekës e hodha lugë-lugë duke e përzier me lugë lehtë sa bëhet një masë homogjene. E poqa në furrë të nxehtë në 185 gradë rreth 15 min.

Pastaj pandispanjën e pjekur e spërkata me liker limoni limoncello. Kisha dhe dy kuti komposto pjeshke një me gjysma e një me feta kompostoje. I radhita të gjitha pjeshkët komposto (gjysmat) tek pandispanja dhe në boshllëqet shtova boronica.

Mund ta bëni me pjeshkë të freskët diuke i zier shumë e duke ua hequr lëkurën. Pastaj u mora me kremin: Për kremin kisha 500 gr kos e rraha me 4 - 5 lugë sheqer, lëngun e një gjysëm limoni dhe lëkurën e limonit.

Xhelatinën (tete fleta kisha) e treta me shpejtësi me pak ujë në mikrovalë. Ia hodha xhelatinën e shkrirë kosit. I përzieva dhe vura dhe 250 ml krem pana të rrahur. Kështu u bë masa e kremit.

Pandispanjën e kisha vënë tek forma e tortave dhe pasi i bëra shtrimin me gjysëm pjeshke mbi pandispanjë, tek boshllëqet e krijuara vura boronica i hodha dhe kremin sipër i cili ishte akoma i lëngshëm, e futa në frigorifer unë e lashë gjithë natën, por mjaftojnë rreth 4 orë.

Në mëngjes kremi ishte trashur dhe bëra dekorin lart me fetat e pjeshkës dhe frutat e pyllit në mes, mjedra, boronica, manaferra. Dekorin dhe frutat i vini pas shijes dhe qejfit tuaj, mund të përdorni topa pjepri, luleshtrydhe, feta kiwi, rrush, ananas etj etj.....)

Pastaj mora 1 pako pluhur të kuq për zhelenë lart (është pektine pluhur me prejardhje bimore). Pakoja tretet me 250 ml ujë dhe vihet në zjarr të marrë valë dhe unë i vura gjysmën lëngun e kompostos së pjeshkës pra 125 ml komposto pjeshke dhe 125 ml ujë.

I vura në zjarr dhe kur ajo mori dy-tre valë e hoqa. E përziej me lugë dhe në gjëndje të ngrohtë por jo të nxehtë. Ia hedh tortës sipër ajo ngrin menjëherë. Na ndiqni dhe në Facebook

HermesNews - ©2013

Dërgo me email | Stampo artikullin