25/02/2013 16:22:13

Postobllok pranë ish-bllokut

Vendosja memorialit të simboleve të diktaturës pritet të miratohet nga Këshilli Bashkiak dhe bashkon në një instalacion tre objekte të ngarkuar me simbolika lokale dhe universale

TIRANË - Kryqëzimi i Bulevardit Dëshmorët e Kombit me rrugën Ismail Qemali, përballë hotel Rogner, do të jetë vendi ku do të vendoset Memoriali për Simbolet e Diktaturës POSTBLLOK. Vendosja e tij, i cili pritet të miratohet nga Këshilli Bashkiak, bashkon në një instalacion tre objekte të ngarkuar me simbolika lokale dhe universale.

Projekti është iniciuar nga Bashkia e Tiranës në bashkëpunim me artistët Fatos Lubonja dhe Ardian Isufi. Karakteristikë e veçantë e këtij kompleksi është se të tre objektet janë autentikë dhe vijnë në formë “artifakti”, çka do të thotë që bartin në vetë trupin e tyre, gjurmët e asaj kohe.

Gjithashtu, ndërhyrja artistike do të realizohet në një hapësirë urbane historike në hyrje të Bllokut, pra pikërisht në vendin ku Bunkeri është instaluar qysh në kohën e diktaturës, ku do të ndërtohet memoriali si një metaforë e “arkeologjisë” së vuajtjes dhe dhimbjes.

Muri i Berlinit është një copë e murit, dhuratë që i është bërë Bashkisë së Tiranës nga Bashkia e Berlinit. Shtyllat e galerisë janë marrë nga miniera e kampit famëkeq të Spaçit. Muri i Berlinit, i njohur në të gjithë botën, është i mbushur me histori, që na kujtojnë ndarjen e botës komuniste nga pjesa tjetër e botës, luftën e ftohtë, izolimin si mjet sundimi, mungesën e komunikimit, tentativat për ta kaluar atë në kërkim të lirisë, vrasjet rrëzë tij dhe më në fund shembjen e tij.

Bunkeri, me një simbolikë veçanërisht shqiptare, evokon izolimin e Shqipërisë, paranojat e diktaturës, mundin e njerëzve për t'i ndërtuar ato nëpër të gjithë territorin e Shqipërisë, si fragmente të një piramide gjigante absurde.

Objekti i tretë është një organizim shtyllash betoni, i një fragmenti galerie miniere si ato ku kanë punuar ish të burgosurit. Ai synon të evokojë mundimin e gulakëve komunistë, punën e papaguar prej skllavi, por edhe skllavërimin e pjesës më të madhe të popullsisë në burgun e madh, pasi pamje të tilla rrënojash të asaj kohe janë pjesë e peisazhit shqiptar anë e kënd.

Vizitori i memorialit ftohet jo vetëm ta vështrojë nga jashtë – rruga apo trotuari – instalacionin, por edhe të futet brenda tij, të ecë nëpër rruginat që lidhin tre objektet, të hyjë brenda bunkerit dhe të rrugëtojë nën dhe nëpër shtyllat e galerisë së Spaçit duke u kthyer me imagjinatë në atë kohë, për të evokuar kohën e diktaturës komuniste me mungesën e lirisë, vuajtjen, izolimin dhe persekutimin që e ka karakterizuar.

HermesNews - ©2013

Dërgo me email | Stampo artikullin