18/11/2014 18:47:28

Të gjithë në stadium. Sonte luajmë në Genova !

Miqësorja Shqipëri - Itali. Duam fitore !

TIRANË - Sot në mbrëmje në orën 20:45’ do të luhet takimi miqësor mes Shqipërisë dhe Italisë, në stadiumin Luigi Ferrari të Genovas. Kuqezinjtë të cilët kanë mbërritur vetëm mbrëmjen e djeshme në kryeqytetin e Ligurias pritet të dhurojnë një natë magjike përballë Italianëve, të cilët paraqiten me një formacion me shumë të rinj në këtë miqësore. Në stadiumin ku do të luajnë kuqezinjtë pritet të jenë 10 000 tifoz shqiptarë. dhe pse Presidenti i Federatës Shqiptare të Futbollit, Armando Duka ka bërë të ditur se janë shitur të 4 mijë biletat e disponueshme për shqiptarët për miqësoren mes kombëtares sonë dhe Italisë, që do të luhet në Gjenova, Agjencia italiane e lajmeve ANSA, ka bërë të ditur se do të jenë 10 000 shqiptarë në stadium. Sipas ANSA-s, numri i biletave që janë blerë nga fansat shqiptarë është shumë i lartë nga sa parashikohej. Ata pritet të mbërrijnë nga të gjitha anët e Italisë dhe të ndërthuren edhe me tifozët italianë. ANSA në artikullin e publikuar prej saj njofton faktin se kjo mësymje e tifozëve shqiptarë në Gjenova ka ngritur në frikësuar autoritetet e rendit dhe sigurisë italiane, të cilat kanë marrë të gjitha masat për të përballuar me sukses mbarëvajtjen e kësaj miqësore. Mediat italiane sqarojnë se do të jenë rreth 300 policë dhe një numër i lartë i Forcave të Ndërhyrjes së Shpejtë, ndër të cilët 210 do të vijnë si përforcime nga veriu i Italisë.

HermesNews - ©2014

Dërgo me email | Stampo artikullin