13/11/2014 09:27:24

Ronaldo hedh në gjyq biografin e Mesit: S’e kam fyer kurrë rivalin tim

Rivaliteti i tyre nuk,është vetëm në fushë, por edhe jashtë saj, sidomos kur është fjala në kampet e ndryshme e kundërshtare, apo dhe me reklamat e shumta që përfaqësojnë e nga të cilat fitojnë

HermesNews - Rivaliteti midis Kristiano Ronaldos e Lionel mesit ka qenë deri tani i nëndheshëm dhe fakti që ata nuk flasin hapur, kanë shumë pak shoqëri etj, tregon se rivaliteti i nëndheshëm është shumë i madh dhe midis tyre ka një urrejtje respektive. Në librin që Giullem Balague që ka bërë biografinë e Lionel Mesit, evidentohen copëza të ndryshme nga ky realitet i hidhur, ku akuzohet madje Kristiano Ronaldo se ka sharë dhe përgojuar yllin argjentinas, madje duke e quajtur në grupin e tij të shokëve edhe si “qenushi i Ronaldos”. Kaq ka mjaftuar që autori të përballet me zemërimin e Ronaldos, i cili ka deklaruar se do ta hedhë në gjyq dhe se çfarëdo që është shkruar në lidhje mes tij e Mesit nuk ka asgjë të vërtetë dhe se ai kurrë nuk e kishte fyer rivalin e tij të Barcelonës dhe të rekordeve individuale.

Atmosfera

Kristiano Ronaldo që ofendon Mesin. Një lajm që bën xhiron e botës, pas biografisë së botuar nga Giullem Balague për Lionel Mesin, ku flitet se portugezi nuk lë rast pa ofenduar Mesin mes kolegësh dhe madje dhe vetë ata kolegë që përmendin emrin e tij. Por duket se në gjithë këtë histori nuk ka asgjë të vërtetë, aq sa portugezi ka nxituar të reagojë duke paralajmëruar madje se do ta hedhë në gjyq shkrimtarin. Në fakt libri i Balague, është e vetmja autobiografi e Mesit e njohur dhe nga klubi i Barcelonës. Dhe duket disi paradoksale por libri ka rreth një vit që ka dalë në treg, por vetëm së fundmi disa copëza të tij kanë filluar të prodhojnë lajm. Madje në brendësi shkruhet se jo vetëm Ronaldo por gjithashtu dhe lojtarët e tjerë të Realit, e etiketojnë argjentinasin si qenin apo lodrën e Ronaldos. Balague në librin e tij madje shfaq dhe ndryshimin mes Ronaldos publik dhe atij në jetën private, teksa përpara kamerave shfaq respekt për rivalin argjentinas, duke pranuar madje se janë të dy të mëdhenj por të ndryshëm ndërsa mes miqsh nuk i kursen ofendimet për të. Publikimi i përmbajtjes ka mjaftuar që Ronaldo të reagojë duke theksuar se ka lajmëruar avokatët e tij për të hedhur në gjyq autorin duke shtuar se respekton në maksimum të gjithë kolegët e tij pa përjashtim, përfshi dhe Mesin.

Ronaldo favorit për “Topin e Artë”

Topi i Artë për vitin 2014 sipas të gjitha gjasave do të fitohet nga Kristiano Ronaldo. Fakti që kompanitë kryesore të basteve në Botë e kuotojnë me një koeficient shumë të ulët suksesin e dytë radhazi të yllit portugez në këtë garë e bën edhe më të besueshëm triumfin e Ronaldos që këtë vit duket se nuk ka rivalë. Sulmuesi i Realit Madridit arriti të spikaste jo pak në edicionin e fundit të Champions League ku Los Blancos u shpallën kampion Europe për të 10-n herë në historinë e tyre duke shënuar 17 gola. Me koeficientin 1.13 shumëzohet basti i vënë për Ronaldon fitues, një kuotë kjo e realizueshme në më shumë se 99% të rasteve. Qëndrojnë shumë pas të gjithë rivalët e futbollistit portugez në këtë garë me Lionel Mesin që pozicionohet i dyti me koefiecentin 8.5.

Arbër Meçenovi

Dërgo me email | Stampo artikullin