12/11/2014 22:55:57

Myftiu i kosovës takon Papën

Në Vatikan po zhvillohet forumi i tretë i dialogur ndërfetar

PRISHTINË - Myftiu i Kosovës, Naim Tërnava, i cili po merr pjesë në Forumin e tretë të dialogut ndërfetar Katoliko - Mysliman në Vatikan, sot së bashku me pjesëmarrësit e Forumit, është pritur në audiencë nga Papa Francesku. Bashkësia Islame e Kosovës bën të ditur se, Papa Francesku në fjalën e tij përshëndetëse u shprehu mirëseardhje përfaqësuesve myslimanë në forum, si dhe i falënderoi ata për kontributin që po japin në ndërtimin e paqes, harmonisë, bashkëjetesës e tolerancës mes popujve dhe feve. Papa, në veçanti çmoi lartë kontributin e prijësve myslimanë që po japin në këtë forum të përbashkët, i cili ka për diskutim temën “Të punojmë së bashku për t’u shërbyer të tjerëve”. Myftiu i Kosovës, Naim Tërnava, falënderoi për kontributin dhe kujdesin e Papës dhe Vatikanit për Kosovën. Myftiu i theksoi Papës nderin që i ka bërë kombit shqiptar me rastin e vizitës së tij në Shqipëri. Me këtë rast, Myftiu Tërnava i dhuroi Papës Monografinë e xhamive të shkatërruara gjatë luftës së fundit në Kosovë.

HermesNews - ©2014

Dërgo me email | Stampo artikullin