27/10/2014 17:19:09

Institucionet në mbrojte të gazetarit

Kryeministri i Qeverisë së Kosovës, Hashim Thaçi, dënoi ashpër sulmin ndaj gazetarit Milot Hasimja

PRISHTINË - Institucionet e vendit, partitë politike dhe organizata të ndryshme joqeveritare e kanë dënuar ashpër sulmin ndaj gazetarit të Klan Kosovës, Milot Hasimja, i cili sot është sulmuar me thikë nga një person në redaksinë e këtij televizioni.

Kryeministri i Qeverisë së Kosovës, Hashim Thaçi, dënoi ashpër sulmin ndaj gazetarit Milot Hasimja, duke e cilësuar atë një akt kundër vlerave të demokracisë, lirive të njeriut dhe shprehjes së lirë.

“Aktet e tilla janë të papranueshme dhe të patolerueshme, pasi cënojnë rëndë lirinë e shprehjes dhe të mendimit, që përbën një nga vlerat më të çmuara të shoqërisë dhe shtetit që po ndërtojmë.

Qeveria e Kosovës i uron shërim sa më të shpejtë gazetarit Hasimja, dhe kërkon veprimin e shpejtë dhe të vendosur të organeve kompetente, në mënyrë që autorët e këtij sulmi të marrin dënimin e merituar”, thuhet në deklaratën e kryeministrit Thaçi.

Sulmin ndaj gazetarit Hasimja e ka dënuar edhe Aleanca për Ardhmërinë e Kosovës, duke e konsideruar këtë sulm një akt makabër, të adresuar jo vetëm kundër jetës së gazetarit Hasimja, por edhe kundër lirisë së medias në përgjithësi.

KMDLNj kërkon nga organet e hetuesisë që të ndërmarrin veprime të shpejta në mënyrë që përgjegjësi për sulmin ndaj gazetarit Hasimja të nxirret para organeve të drejtësisë dhe të dënohet në përputhje me ligjin dhe peshën e krimit.

“Këto kërcënime dhe sulme ku rrezikohet jeta e gazetarëve dekurajojnë gazetarinë hulumtuese dhe informimin e drejtë”, thuhet në reagimin e KMDLNj-së.

HermesNews - ©2014

Dërgo me email | Stampo artikullin