26/10/2014 18:11:12

Tailleur Chanel, veshja që bëri histori

Veshja e famshme Chanel që i mbizoteroi kohës dhe historisë

PARIS - Një grua e fortë, që lufton për lirinë dhe pavarësinë e gruas në një periudhë kur rolet janë të ndara. Gruaja, në shtëpi me fëmijet, ndërsa mashkulli, i pari i shtëpisë, punon dhe vendos mbi çdo gjë. Edhe moda femërore duket sikur shoqëron e i përshtatet këtij vizioni. Coco Chanel revolucionon modën dhe rolin e gruas si koncept. Linja minimale dhe tejet praktike, që i përshtaten gruas tashmë dinamike te viteve ’50, por pa cënuar kurrësesi feminilitetin dhe elegancën që i shkon përshtat femrës.

Bëhet fjalë për vitin 1953 kur boutique i famshëm Chanel në Rue Cambon 21 Paris rihap dyert pas Luftës së Dytë Botërore. Mademoiselle, si përkrahëse e tendencave moderne dhe praktike të modes, i kundërvihet stilistëve të kohës si Dior e Balenciaga duke iu përshtatur grave aktive gjatë luftës. Më 5 shkurt 1954 paraqet një koleksion me rreth 130 veshje, ndër të cilat edhe tailleur-i i shumëdëgjuar e i shumëkërkuar.

Detajet unike si shirita nëpër cepa për t’i dhënë formë veshjes, kopsat prej metali me kokë luani e shumë detaje të tjera glamour që bashkë me aksesorët për të cilët Chanel shquhet më së miri, kontribuojnë në krijimin e një imazhi të rafinuar po aq sa dinamik dhe vizionar të femrës.

Shtypi francez nuk është aspak entuziast me këtë koleksion, ndaj nuk humbet rastin për t’a masakruar verbalisht duke i ngjitur pas atributet e një dështimi. Përkundrazi, LIFE magazin, revista më e lexuar ne Shtetet e Bashkuara, shkruan: “ Në moshën 71 vjeçare Chanel krijon shumë tepër se një koleksion mode, një revolucion në kuptimin e plotë”.

Nga ai moment moda dhe stili i Maison bëhen të famshëm në të gjithë botën duke u ngjitur gjer në trupat e divave të kohës si Grace Kelly, Ingrid Bergman, Brigitte Bardot, Liz Taylor, por edhe zonja e parë Jacqueline Kennedy, e cila pikërisht ditën e vrasjes së presidentit Kannedy mbante nje tailleur rozë Chanel.

Me Karl Lagerfeld miti vazhdon. Në vitin 1983 (pas vdekjes së Coco më 1971) Karl Lagerfeld u emërua si drejtori artistik i Maison Chanel dhe atëhere thirri modelen e atëhershme Ines de la Fressangne (sot gazetare e modës për Marie Claire), e cila filloi të vishte rregullisht tailleur-in e famshëm duke mishëruar kështu imazhin e Mademoiselle Chanel. Veshja, me kalimin e kohës, u pasurua me tendencat moderne të kohës. Përveç materialeve klasike, u shtuan edhe metrazhe të kohës si jeans, lëkurë, peliçe, etj.

Veshja tailleur vazhdon të jetë kështu një sukses si trashëgimi e Chanel që shkon përtej kohës, modës, pasarelave, i destinuar për të mbetur në histori. Andre Malraux, shkrimtar dhe politikan francez, shkruan: “Gjatë shekullit të fundit, në Francë, do të mbeten tri emra: De Gaulle, Picasso dhe Chanel”.

Daniela Vathi

Dërgo me email | Stampo artikullin