25/10/2014 17:40:14

Mbyllet java kundër dhunës

Qëllimi i kësaj fushate ishte që të tregohet se ka raste të dhunës në shkolla, e po ashtu edhe në familje, por se këto raste duhet të parandalohen duke krijuar mekanizma të besueshëm

PRISHTINË - Në Kosovë u përmbyll java e fushatës së aktiviteteve me moton ‘Java kundër dhunës ndaj fëmijëve’, ku morën pjesë nxënës të dhjetë shkollave nga i gjithë vendi, me pikturë dhe ese, pikërisht me temën ‘Mbrojtja e fëmijëve nga dhuna’. Sipas KosovaPress, qëllimi i kësaj fushate ishte që të tregohet se ka raste të dhunës në shkolla, e po ashtu edhe në familje, por se këto raste duhet të parandalohen duke krijuar mekanizma të besueshëm, që fëmijët të mos hezitojnë të tregojnë për rastet e dhunës që kanë pësuar. Projekt menaxheri i Organizatës Joqeveritare “Syri i Vizionit, Naser Lajçi, tha se tani për tani nuk ka statistika të sakta se sa ekziston dhuna në shkolla. Por , vijoi ai, dhuna është e pranishme kudo ndaj fëmijëve dhe se me rritjen e vetëdijes së fëmijëve dhe besimit të tyre, rastet e fëmijëve për të denoncuar dhunën janë në rritje. Lajçi theksoi se duhet të krijohen mekanizma mbrojtës për të drejtat e fëmijëve si nga ana vendore e po ashtu edhe nga ajo ndërkombëtare. Ndërsa menaxheri i ueb faqes ‘Respektoni të drejtat tona’, Dukagjin Nishiqi, tha se “kjo faqe përmban informacionet për të drejtat e fëmijëve të cilat janë të miratuara edhe nga Kombet e Bashkuara”. Fëmijët, të cilët u dalluan me pikturat dhe esetë e tyre, iu ndanë edhe disa shpërblime.

HermesNews - ©2014

Dërgo me email | Stampo artikullin