07/10/2014 17:15:15

Kurti takon Jahjagan

Kryetari i lëvizjes Vetëvendosje, Albin Kurti, së bashku me deputetin Visar Ymeri, patën sërish takim me Presidenten Jahjaga me ftesë të saj

PRISHTINE - "Sot ishte edhe një takim i radhës me zonjën Presidente. Ne të Lëvizjes VETËVENDOSJE! përsëritëm qëndrimin tonë që ne e duam demokracinë në qendër, e qendra në Republikën Parlamentare është Kuvendi. Por, në të njëjtën kohë ne besojmë që Republika e Kosovës, e cila është bërë Republikë e pakicës, duhet të bëhet Republikë e shumicës. Në këtë bërje të Republikës, Republikë të shumicës, është Gjykata Kushtetuese që po na pengon, ndërkaq Presidentja nuk po na ndihmon", tha kreu i lëvizjes Vetëvendosje Albin Kurti, pas takimit me presidenten Jahjaga.

Çfarë po kërkoni prej Presidentes ? A do të marrë fund pushteti i PDK-së këtë të enjte ?

Pushteti aktual i PDK-së është pushtet ilegal dhe pushtet ilegjitim. Ata nuk janë pushtet demokratik, dhe po e theksoj se e kanë degraduar Republikën e Kosovës në Republikë të pakicës. Ne e kemi qëndrimin tonë të qartë: në Republikën e Kosovës nuk mund ta shpëtojmë edhe Thaçin edhe Veselin në njërën anë, edhe Republikën në anën tjetër. Pra, qytetarët e Republikës, politikanët, deputetët, që të gjithë ne së bashku e veç e veç duhet të marrim një qëndrim të qartë: A jemi për të shpëtuar Republikën? Apo për t’i shpëtuar Thaçin, Veselin dhe kompaninë e tyre? Unë besoj që duhet ta shpëtojmë Republikën.

A do të zgjidhet Kryetari i Kuvendit të enjten apo jo ?

Varet prej dy faktorëve: debati në seancën konstituive që zhvillohet të enjten, dhe takimi që do ta kemi ne krerët e katër subjekteve nënshkruese të marrëveshjes së 10 shtatorit.

A do të merrni pjesë në takimi e radhës nëse ju thërret Presidentja ?

Sa herë që na thërret, gjithmonë do të vijmë.

A u përmenden zgjedhjet? Për shkak se Presidentja ka thënë ose takim të përbashkët të të gjithë liderëve, ose të merret vendim për zgjedhje ?

Takimi i përbashkët është shumë lehtë i realizueshëm, në sallën e Kuvendit të Republikës, dhe kjo mund të ndodhë qysh pasnesër.
Sa i përket zgjedhjeve të reja që janë paralajmëruar shpeshherë nga partia në pushtet, ato legalisht, ligjërisht e juridikisht nuk janë të mundshme. Ne si VETËVENDOSJE! kemi qenë gjithmonë të gatshëm për zgjedhje, por tash jemi të interesuar që t’i konstituojmë institucionet e legjislaturës së pestë, ta zgjedhim Kryeparlamentarin e më pas të kalojmë tek gjëja kryesore që është formimi i Qeverisë së re.

Ju thatë që “Gjykata Kushtetuese po na pengon, ndërkaq Presidentja nuk po na ndihmon”, a do të thotë që do t’i shpërfillni këto dy institucione dhe do t’i jepni përparësi shumicës parlamentare ?

Unë jam duke i përfillur të gjitha ftesat e Presidentes, dhe tash për tash nismat e saj kanë qenë të tilla. Pra, takime. Unë jam duke i respektuar të gjitha këto ftesa një nga një.

komunikatë për shtyp

Dërgo me email | Stampo artikullin