27/09/2014 16:37:28

Jahjaga takon ministrin e vatikanit

Sekretari për marrëdhënie me jashtë i Selisë së Shenjtë, kardinali Pietro Parolin u interesua për zhvillimet aktuale në Kosovë

PRISHTINË - Presidentja e Republikës së Kosovës,Atifete Jahjaga u takua sot në New York me sekretarin për marrëdhënie me jashtë të Selisë së Shenjtë, kardinalin Pietro Parolin. Presidentja Jahjaga e vlerësoi lart vizitën e Papa Francesku në Shqipëri dhe porositë e tij për paqen dhe mirëkuptimin ndërmjet njerëzve. Presidentja Jahjaga tha se Kosova, që prej shpalljes së pavarësisë së saj më 2008, është shndërruar në një faktor të rëndësishëm të paqes dhe të stabilitetit si dhe promovuese e fqinjësise së mirë. Ajo tha se Kosova është e ndërtuar mbi parimin qytetar dhe vlera më e madhe e saj është toleranca fetare e kultivuar ndër shekuj. Presidentja Jahjaga tha se trashëgimia kulturore e fetare e Kosovës është pasuri e madhe e vendit nën përkujdesjen e institucioneve dhe të vetë qytetarëve të Kosovës. Duke vlerësuar procesin e konsolidimit ndërkombëtar të vendit, Presidentja Jahjaga tha se Kosova sot është e pranuar nga 108 vende të botës dhe se pranimi nga Vatikani do të kishte një rëndësi të veçantë. Sekretari për marrëdhënie me jashtë i Selisë së Shenjtë, kardinali Pietro Parolin u interesua për zhvillimet aktuale në Kosovë, për dialogun ndërmjet Kosovës dhe Serbisë për normalizimin e marrëdhënieve, si dhe për perspektivën evropiane të Kosovës dhe gjithë rajonit.

HermesNews - ©2014

Dërgo me email | Stampo artikullin