18/09/2014 14:35:21

LDK-AAK-Nisma e VV: Qeverine e vendosim ne

Deklaratë e përbashkët e partive politike në Kosovë

PRISHTINË - Koalicioni LDK-AAK-Nisma për Kosovën dhe Lëvizja Vetëvendosje, pas vazhdimit sot të seancës konstituive, në një deklaratë të përbashkët “konstatojnë dështimin e PDK-së për të zgjedhur Kryetarin dhe për të konstituuar Kuvendin në Legjislaturën V”. “Plot 100 ditë që prej datës së mbajtjes së Zgjedhjeve të përgjithshme ishin të pamjaftueshme për PDK-në që të krijojë shumicën në Kuvend. Sot, shumica absolute, pra 61 deputetë, ishin kundër propozimit të PDK-së, kandidati i të cilës mori vetëm 44 vota”, theksohet në deklaratë. Më tej shtohet se, “Koalicioni i shumicës parlamentare konstaton se ndërprerja e Seancës nga kryesuesja, deputetja Brovina, pa e respektuar të drejtën e deputetëve të koalicionit të shumicës për fjalë, ishte jokorrekte”. “Koalicioni i shumicës parlamentare konsideron se, duke u bazuar në pikën 127 të Aktgjykimit të Gjykatës Kushtetuese për rastin Nr. KO 119/14, të 26 gushtit 2014, e ka të drejtën, mundësinë dhe zgjidhjen për të konstituuar Kuvendin e Republikës së Kosovës dhe pastaj për të vijuar me formimin e Qeverisë së re”, përfundon deklarata e përbashët pas një takimi. “PDK-ja pret që të reflektojnë partitë e tjera që të zgjidhet ngërçi politik”, citohet Brovina nga media. Ndersa, sipas deputetes së LDK-së, Vjosa Osmani, tani “vullneti i shumicës dihet, PDK duhet të lëshojë rrugë”. Ajo ka shtuar se nuk pret ndërhyrjen e ndërkombëtareve. Udhëheqësi i subjektit serb me 9 deputetë, Aleksander Jabllanoviç, ka thënë se koalicioni paszgjedhor LDK-AAK-Nisma “nuk do ta ketë përkrahjen e Listës Srpska për aq kohë sa me ta do të jetë VV-ja”.

HermesNews - ©2014

Dërgo me email | Stampo artikullin