16/09/2014 17:03:39

Kosova ju thotë mirëdita në Beograd

Starton festivali ''Mirëdita, Dobar dan !'' nga 18 deri në 21 shtator

PRISHTINE - “Kosova ju thotë mirëdita”, titullohet veprimtaria kulturore, që do të zhvillohet gjatë kësaj jave në kryeqytetin e Serbisë, Beograd. Organizatorët bëjnë të ditur se, festivali “Mirëdita, Dobar dan!”, i cili mbahet në Beograd nga data 18 deri më 21 shtator, ka për qëllim njohjen e publikut serb me skenën kulturore të Kosovës. Synimi i organizatorëve është që ky festival të vazhdojë të organizohet në mënyrë tradicionale, duke kontribuar në vazhdimësi në vendosjen e paqes së përhershme dhe normalizimin e marrëdhënieve mes Kosovës dhe Serbisë. “Bekim Fehmiu, aktor shqiptar, kosovar, beogradas, jugosllav dhe botëror, është simbol i të kaluarës së përbashkët, përmes të cilës, me të gjitha sfidat, arritjet dhe keqkuptimet, ka shërbyer si frymëzim për themelimin dhe realizimin e këtij festivali”, thekson njoftimi. Vizitorët e këtij festivali do të kenë mundësinë që të njihen me skenën kulturore të Kosovës – teatër, film, muzikë dhe artet vizuale. Përveç paraqitjeve artistike, festivali do të organizojë debate publike, të cilat do të ekzaminojnë marrëdhëniet kritike midis Prishtinës dhe Beogradit, nga pikëpamja e të kaluarës, si dhe nga perspektiva e bashkëpunit në fushën e ekonomisë, tregtisë, arsimit, kulturës, sportit, sektorit civil dhe të gjitha segmenteve të tjera të shoqërisë. Festivali organizohet nga: Integra (Kosovë), Iniciativa Qytetare (Serbi) dhe Qendra për Politika (Serbi), si dhe mbështetet nga forum ZFD për Ballkanin Perendimor, Fondacioni i Kosovës për Shoqëri të Hapur – Soros.

HermesNews - ©2014

Dërgo me email | Stampo artikullin