24/07/2014 18:10:57

Sfidat e menaxhimit të kosovës

Kosova ende përballet me shumë sfida përsa i përket menaxhimit dhe kontrollit financiar. Intervistë për Radio Kosovën i zëvendësit te auditorit të përgjithshëm, Artan Venhari

PRISHTINE - RADIO KOSOVA: z.Venhari, keni publikuar tashmë raportet e auditimit për vitin 2013 për institucionet, komunat dhe organizatat tjera buxhetore. Çfarë i karakterizon këto raporte?

A.VENHARI: Kur flasim për raportet e auditimit, zyra e auditorit të përgjithshëm ka publikuar rreth 90 raporte të rregullsisë, ndërsa deri në fund të sezonit do të dalin edhe raportet e performansës. Një përmbledhje e të gjitha këtyre te gjeturave tona për të gjitha raportet që i kemi nxjerrë për vitin 2013, edhe të performansës, do t’i publikojmë në raportin vjetor të auditimit, të cilin do ta dorëzojmë në Kuvend dhe do të jetë publik edhe për mediat. Por nëse flas lidhur me të gjeturat e përgjithshme, mund të them që kur flasim për cilësinë e informatave financiare, mund të them që cilësia e informatave nga viti në vit po rritet, mirëpo njëkohësisht ekziston një numër i madh i sfidave me të cilat po përballet Kosova sa i përket menaxhimit financiar dhe kontrollit financiar.

RADIO KOSOVA: Kur do t’i publikoni raportet e performansës të organizatave buxhetore?

A.VENHARI: Raportet e performansës publikohen në vazhdimësi, për shkak se raportet e rregullsisë janë të lidhura me afate kohore të cilat janë të parapara sipas Kushtetutës por edhe me ligjin për Auditorin e Përgjithshëm. Raportet e performansës apo jostatutore nuk janë raporte që obligojnë Zyrën e Auditorit me ligj, nuk e lidhin me afat kohor, prandaj jemi në proces të hartimit të disa raporteve dhe ma merr mendja se së shpejti do të kemi edhe raportet të cilat do të dalin.

RADIO KOSOVA: Z. Venhari, përmendët disa sfida, por a mund të thoni se cilat janë shkeljet kryesore të organizatave buxhetore?

A.VENHARI: Ndoshta do ta kisha adresuar më ndryshe, ndoshta nuk do të kisha thënë shkelje për shkak se në rast se ka aktivitete të dyshimta, ato aktivitete shkojnë dhe i referohen prokurorisë që të merret me to. Por atë që jemi duke shikuar, nëse kemi një sfidë apo problem, po përpiqemi të shikojmë çka është shkaktari i atij problemi, të hyjmë në mënyrë më të thellë, më sistematike, të shikojmë se cilat janë ato problemet që na paraqiten vit pas vit, jemi duke u përpjekur që t’i shikojmë mangësitë dhe gabimet të cilat janë duke u përsëritur më së shumti. Ajo çka po vërejmë në përgjithësi është se organizatat buxhetore nuk kanë problem vetëm me ekzekutimin e buxhetit, pra nuk është vetëm ekzekutimi i dobët por është edhe thjeshtë planifikimi i dobët dhe shumë organizata janë duke u ballafaquar me të. Po shohim se nëse flasim për komunat, sistemet e kontrolleve të brendshme apo raportimi i brendshëm është mjaft i dobët, dhe kjo nuk iu mundëson menaxhmentit nëpër komuna që t’i kuptojnë problemet edhe ekzistojnë edhe mënyrat shumë të thjeshta për t’i zgjidhur ato probleme, që do të ishte zhvillimi i ndonjë softueri apo blerja e ndonjë programi. Ka probleme pastaj edhe tek vijat e paqarta të llogaridhënies që vërejmë tek disa agjenci ekzekutive, kujt do i raportojnë ato brenda ministrive, i raportojnë vetëm ministrit apo ka delegim edhe te sekretari permanent, pastaj ka disa zyrtarë të cilët edhe pse ligji e thotë mund të mbajnë pozita si ushtrues detyre tre muaj, shohim që janë në periudha shumë më të gjata. Ndër problemet kryesore që zyra e auditorit i ka ngritur janë problemet lidhur me prokurimin, për shkak se ka shumë parregullsi sistematike dhe duhet të rishikohet tërë kjo, sepse nëse bëjmë prokurimin në masë, do duhej që gjërat që ne si shtet i blejmë duhet të jetë shumë më i lirë dhe dallojnë shumë çmimet brenda agjencive të ndryshme, p.sh. kur kemi të bëjmë me derivatet e naftës që dallojnë prej agjencisë në agjenci. Detyrimet është njëra nga fushat ku shohim se prej vitit të kaluar ka pësuar hap prapa për shkak se masa e detyrimeve krahasuar me vitin paraprak është rritur. Edhe i shohim problemet të cilat janë me regjistrimin e aseteve nëpër institucione për shkak se softueri i cili është në shfrytëzim nuk bën amortizimin ashtu siç duhet. Pra kemi shumë dobësi të cilat janë vërejtur edhe gjatë viteve paraprake dhe nuk shohim lëvizje të madhe.

Radio Kosova

Dërgo me email | Stampo artikullin