08/07/2014 14:26:28

Vazhdon turi i Vox Baroque

Koncerti i fundit do të zhvillohet në zonën turistike të Voskopojës

TIRANË - Festivali i muzikës së vjetër Vox Baroque, vazhdon të shfaqet në qytetet kryesore të vendit. Vila e Zogut në Durrës ishte stacioni i parë për këtë festival të muzikës së vjetër Vox Baroque në Shqipëri. Përmes artit, interpretimit instrumental të specializuar të repertorit barok, festivali synon jo vetëm të kultivojë shijet e artdashësve për muzikën e vjetër, por edhe të promovojë vlerat e trashëgimisë sonë historiko-kulturore, duke i nxjerrë në pah ato. Ansambli austriak i tingullit origjinal Barucco, i pari që hapi këtë festival, u mirëprit nga të ftuarit me pjesë nga repertori i kompozitorëve Purcell, Corelli, Schmelzer dhe Muffat. Ky festival zhvillohet në pesë nga qytetet më të rëndësishmet të trashëgimisë kulturore të Shqipërisë si: Durrësi, Tirana, Shkodra, Berati dhe Fieri. Koncerti i fundit do të zhvillohet në zonën turistike të Voskopojës. Ky aktivitet organizohet me mbështetjen e Ministrisë së Kulturës nga datat 2 deri më 12 korrik.

HermesNews - ©2014

Dërgo me email | Stampo artikullin