24/06/2014 01:39:11

Holanda s’ka të ndalur

Kombëtarja e Holandës e ka regjistruar edhe fitoren e tretë në fazën grupore duke e mposhtur Kilin me rezultat 2-0

HermesNews - Kombëtarja e Holandës ka regjistruar edhe fitoren e tretë në fazën grupore duke e mposhtur Kilin me rezultat 2-0.

Në pjesën e parë të takimit të zhvilluar në Sao Paulo nuk u shënuan gola. Ishte një gjysmë e zbehtë për nga rastet, pasi të dyja skuadrat ishin të kujdesshme dhe njëherësh u mungonte motivimi.

Arjen Robben krijoi një rast të shkëlqyer nga fundi i pjesës së parë duke e marrë topin nga mesi i fushës dhe tre lojtarë kundërshtarë nuk arritën ta ndalnin. Mirëpo, goditja e tij përfundoi jashtë porte.

Në gjysmën e dytë, holandezët bënë presion duke e mbajtur topin në gjysmëfushën e kilianëve dhe ky angazhim u shpagua.

Vetëm dy minuta pasi hyri në lojë (në vend të Wesley Sneijder), Leroy Fer e zhbllokoi rezultatin (77’).

Në minutat shtesë erdhi edhe goli i dytë i holandezëve. Një tjetër zëvendësues – Memphis Depay e shënoi golin, ndërsa Arjen Robben asistoi.

Arbër Meçenovi

Dërgo me email | Stampo artikullin