09/06/2014 15:55:51

Varrezë masive shqiptarësh në Serbi

Kosova vazhdon të kërkojë zbardhjen e fatit të mëse 1700 qytetarëve të saj të zhdukur

PRISHTINË - Kanë vazhduar punët në Rudincë, afër Rashkës në Serbi, në lokacionin e varrezës masive. Në vendodhjen ku është duke u punuar, janë zbuluar 40 trupa të viktimave dhe pjesë tjera trupore, ku sipas raportit nga Departamenti i Mjekësisë Ligjore (DML) numri i viktimave që janë zbuluar deri më tani, vlerësohet të jetë 45.

Sipas drejtorit të DML-së, Arsim Gerxhaliu, pjesa më e madhe e këtyre gjetjeve mortore janë zbuluar nga pjesa veriore e varreze masive.

“Gjetjet mortore të ekzaminuara i janë nënshtruar procesit të autopsive dhe identifikimit të mbetjeve mortore, kurse në javët në vazhdim parashihet të behët hulumtimi i terrenit në afërsi ku supozohet të ketë edhe një varrezë tjetër në këtë lokacion”, ka thënë Gerxhaliu.

Në këtë vendodhje, janë duke kryer hulumtimet me ekspertë nga Departamenti i Mjekësisë Ligjore, nga misioni i EULEX-it, nga Serbia, Kryqi i Kuq ndërkombëtar dhe ICMP.

Në varrezën masive të zbuluar në Rudnicë, lokalitet në jug të Serbisë, mendohet se janë groposur së paku 250 shqiptarë të vrarë e të masakruar në Kosovë. Mëse 15 vjet pas luftës, Kosova vazhdon të kërkojë zbardhjen e fatit të mëse 1700 qytetarëve të saj të zhdukur.

HermesNews - ©2014

Dërgo me email | Stampo artikullin