06/06/2014 16:51:56

Shpërthim në termocentral

Viktima dhe te plagosur

(17:05) Kryetari i Kuvendit, Ilir Meta i shprehu ngushëllime homologut të tij kosovar,Jakup Krasniqi për ngjarjen tragjike të ndodhur në Obliq.

Nëpërmjet një telegram ngushëllimi, Meta shpreh ngushëllime të sinqerta për të afërmit e viktimave ndërsa uron shërim të shpejtë për të plagosurit.

“Jemi pranë familjarëve dhe autoriteteve kosovare. Solidaritet vëllazëror me gjithë popullin kosovar. Lutemi që bilanci dramatik të mos thellohet”, thuhet në telegramin e ngushëllimit të Kryeparlamentarit Meta.


(17:00) Kryetari i Kuvendit të Republikës së Kosovës, Jakup Krasniqi, shpreh dhimbjen dhe pikëllimin e thellë për jetët e humbura të punëtorëve të KEK-ut, si pasojë e shpërthimit të sotëm në Termocentralin Kosova A.

Kryeparlamentari Krasniqi u shpreh ngushëllimet më të sinqerta familjeve të punëtorëve që humbën jetën, duke konfirmuar se është pranë tyre në këto momente dhimbjeje.

Duke shprehur solidaritetin me punëtorët e tjerë të lënduar nga ky shpërthim, kryeparlamentari Krasniqi u dëshiron atyre shërim sa më të shpejtë.


(16:57) Kryetari i Lidhjes Demokratike të Kosovës, Isa Mustafa, ka shprehur dhimbjen e tij të thellë dhe të LDK-së për humbjen e jetëve të punëtorëve të KEK-ut, si pasojë e një shpërthimi që ndodhi sot.

“Jemi të tronditur nga kjo tragjedi dhe ju shprehim ngushëllimet më të sinqerta familjeve të punëtorëve që humbën”, ka thënë Kryetari Mustafa.

Ai, me këtë rast, të gjithë punëtorëve të lënduar u ka uruar shërim sa më të shpejtë, duke i siguruar ata për solidaritetin e plotë të LDK-së dhe të tijin personalisht.

LDK-ja deklaron se po ndjek me shqetësim zhvillimet e sotme në KEK duke qëndruar tërësisht pranë familjeve që humbën më të dashurit e tyre.


(16:55) Nga shpërthimi i ndodhur paraditen e sotme në Korporatën Energjetike të Kosovës, në Obiliq, deri tani kanë mbetur të plagosur 14 punëtorë të kësaj korporate, bën të ditur gazeta “Ekspress”.

Gazeta njofton disa nga emrat, vendlindjet dhe moshën e punëtorëve të KEK-ut që u plagosen sot gjatë shpërthimit, të cilët janë; Naim Hajrizi 1978 Prishtinë, Bashkim Kutllovci 1950 Prishtinë, Bashkim Tanaj 1968 Obiliq, Nyredin Dardhishta 1985 Kaqanik, Izet Dedinca 1969 Lajthisht-Obiliq, Mentor Avdyli 1979 Dobroshevc Drenas, Besim Elezi 1977 Mihhaliq – Obiliq, Elmza Hoxha 1956 Miradi e ulet – Fushë Kosovë, Shemsi Klinaku 1975 Obiliq, Besim Krasniqi 1974 Obiliq, Rrahman Alshiqi 1953 Obiliq, Hamdi Kutllovci dhe Ali Kutllovci.

Sipas gazetës “Ekspress”, policia e Kosovës ka nisur evakuimin e banorëve rreth KEK-ut, pasi priten shpërthime të tjera. Pavarësisht se FSK ndodhet në vendngjarje, ata nuk po mund të ndërhyjnë nga rreziku i shpërthimit te dy bombolave të tjera të gazit, si dhe të shembjes së pjeses tjetër të ndërtesës.
Nga vendngjarja është larguar ndihma e shpejtë dhe automjetet e tjera, për shkak të këtij rreziku..

Gazetari i “Express”, Visar Duriqi, i cili ndodhet në vendin ku ka ndodhur shpërthimi i parë, raporton se shkalla e rrezikshmërisë për shpërthime të reja të hidrogjenit vazhdon të jetë e lartë.

Ai tha se dy bombola që kanë rrjedhje hidrogjeni paraqesin shumë rrezik, ndaj edhe policia ka rrethuar objektin dhe nuk lejon të afrohet njeri.

Zëdhënësi i QKUK-së, Shpend Fazliu, ka konfirmuar se deri tani në QKUK kanë kërkuar ndihmë mjekësore 14 persona. Sipas tij, vetëm një ka lëndime më të rënda, ndersa të tjerët kanë djegie të pjesëve të trupit.

Një shpërthim i madh ndodhi paraditen e sotme në KEK, Obiliq, jashtë kazanave të Termocentralit Kosova A. kazanat e Kosovës A. Mësohet se nga shpërthimi ka viktima dhe persona të lënduar, por pritet konfirmimi zyrtar nga mjekët.

PRISHTINË - Një shpërthim i madh ka ndodhur sot në Korporatën Energjetike të Kosovës, (KEK), në Obliq, jashtë kazanave të Termocentralit Kosova A. kazanat e Kosovës A. Zhurma e këtij shpërthimi është dëgjuar edhe në disa pjesë të Prishtinës.

Gazeta Express nuk ka arritur ende ta konfirmojë zyrtarisht këtë lajm, pasi zyrtarët e kësaj korporate nuk japin informacion për gazetarët. Policia, ndërkaq, i tha Express-it se “janë në dijeni të një shpërthimi”, por nuk dinë asgjë më tepër.

Drejtori i Prodhimit, Arben Gjuka, tha se shpërthimi ka qenë i fuqishëm dhe ka ndodhur në pjesët ndihmëse të Kosovës A. “Policia është në vend të ngjarjes, unë jam afër vendit të ngjarjes. Ende nuk e dimë se sa persona janë të lënduar apo të vdekur”, u shpreh Gjuka për gazetën “Express”. Burime nga gazeta “Zëri” deri më tani konfirmojnë se numri i të vdekurve si pasojë e shpërthimit të Hidrogjenit, ka arritur në 3. Ndërsa mësohet se deri më tani 11 persona janë të lënduar dhe janë jashtë rrezikut për jetën. Burime të Kosovapress-it kanë thënë se në Kosova A ka ndodhur një shpërthim i disa kimikateve, të cilat bëjnë zbutjen e ujit.

HermesNews - ©2014

Dërgo me email | Stampo artikullin