30/05/2014 14:10:26

Kosova dhe Shqipëria një kurrikulë universitare

Së shpejti marrëveshja për unifikimin e kurrikulave të sistemit parauniversitar

PRISHTINE - Më 3 qershor do të nënshkruhet në Tiranë marrëveshja për unifikimin e kurrikulave të sistemit parauniversitar ndërmjet Republikës së Kosovës dhe asaj të Shqipërisë. Kjo marrëveshje vjen si rezultat i punës së përbashkët të grupeve profesionale, që janë formuar nga dy Ministritë e Arsimit. Kosova dhe Shqipëria do të kenë një kurrikulë të përbashkët të sistemit të arsimit parauniversitar. Kjo kurrikulë do t’i paraprijë edhe hartimit të teksteve të përbashkëta. Shefi i kabinetit në Ministrinë e Arsimit, Arbër Morina, tha për Radio Kosovën, se marrëveshja për unifikimin e kurrikulës, që do të nënshkruhet më 3 qershor në zyrën e kryeministrit Edi Rama në Tiranë, vjen si rezultat i punës së grupeve të ekspertëve. “Kjo është si rezultat i punës së vazhdueshme të minstrit Buja për nënshkrimin e kësaj marrëveshjeje. Një punë që e kanë bërë grupet profesionale të cilat janë themeluar ng atë dy ministrat. Tashmë është një lajm i mirë për mbarë arsimin, për mbarë shqiptarët se tashmë nxënësit e arsimit parauniversitar do të mësojnë me sistemin e unifikuar të arsimit Kosovë-Shqipëri.” Morina bëri të ditur se tashmë Ministria e Arsimit e Shqipërisë i ka bërë ndryshimet e nevojshme në legjislacionin e tyre për arsimin parauniversitar, të cilat pritet të aprovohen.

HermesNews - ©2014

Dërgo me email | Stampo artikullin