21/05/2014 17:23:08

Dy shqiptare në Cannes

Filmi i tipit ''Road movie'' vë në skenë dy vëllezër shqiptarë që kërkojnë babain e tyre grek për të marrë kombësinë e tij

CANNES - Pas mbylljes së menjëhershme të një kanali publik që supozohet se financonte këtë film dhe ekstremin e djathtë, filmi “Xenia” pati shumë vështirësi për t’u realizuar, por Panos Kutras ka të gjitha arsyet për t’u gëzuar që është në Kanë. Filmi i tipit “Road movie” vë në skenë dy vëllezër shqiptarë që kërkojnë babain e tyre grek për të marrë kombësinë e tij. “Xenia” (mikpritje në greqisht) flet për vorbullat universale të adoleshencës, nën sfondin e çështjeve të integrimit, imigracionit, homoseksualitetit dhe krizës.

Nga Athina në Selanik, Dany, 16 vjeç, homoseksual i kthyer në femër (Kostas Nikouli) dhe Oddy, 18 vjeç (Nikos Gelia), më të pjekur dhe të zhgënjyer, do të jetojnë një odise të re që shoqërohet nga urrejtja dhe indiferenca.
“Kisha dëshirë të flisja për rininë”, tregon Panos Kutras duke shtuar se “të jesh adoleshent është gjithnjë e njëjta gjë, sot është edhe më e vështirë”.

Kriza shfaqet në film nën trajtën e një hoteli luksi të braktisur në të cilin dy vëllezërit gjejnë strehim. Ai i përkiste një zinxhiri hotelesh, “Xenia”, i ndërtuar në fund të viteve ’50 dhe simbol i një Greqie dikur të begatë.
Por, filmi arriti të vazhdojë xhirimet ndonëse kanali televiziv ERT u mbyll menjëherë në mes të xhirimeve duke bllokuar financimet e filmit.

“Fatmirësisht producentët francezë dhe belgë vendosën të vazhdojnë. Vazhdojmë të kemi disa borxhe por kanali televiziv i ri që u krijua do të rimarrë angazhimet që kishte i mëparshmi”, tha ai. Duke zgjedhur që të flasë për shqiptarët e lindur dhe të rritur në Greqi, është një parabolë për të dënuar të drejtën e gjakut që është në fuqi në Greqi ndryshe nga ligji mbi pronën në Francë dhe vende të tjera.

Një zgjedhje politike

Në film, Ody tregon se tashmë ai mund të dëbohet, vetëm nëse babai i tij grek, i cili nuk e ka njohur, pranon ta bëjë. Sipas regjisorit, ka rreth 200 mijë persona në Greqi që gjenden në një situatë të tillë.

Kineasti paraqet gjithashtu një vend homofob dhe ksenofob me të cilin përballet kryesisht vëllai Dany, pre e lehtë për njerëzit e barakave.
“Është realiteti. Doja të flisja për këtë pasi është ajo çka po ndodh në Athinë”, shpjegon regjisori homoseksual duke iu referuar veprimeve të lëvizjes së ekstremit të djathtë ”Agimi i Artë” në vendin e tij.

“Ndërkohë që po xhironim skenën e një bastisjeje, disa përkrahës ekstremistë erdhën. Producentja foli me ta për t’i qetësuar duke u shpjeguar se bëhej fjalë për një bashkëpubim franko-belg. Na u desh të luanim skenën në mënyrë të heshtur për të mos i nxehur. Ata ndenjën pranë nesh gjithë kohën për të na përgjuar”, tregon kineasti, i cili është i shqetësuar për rritjen e ekstremizmit në Evropë.

Megjithatë Panos Kutras është shumë krenar që në Greqi del për herë të parë një film ku protagonistë janë shqiptarët. Është një zgjedhje politike.
Kineasti dëshiron gjithashtu që në këtë film të flasë për dashurinë vëllazërore, qoftë kjo për arsye gjaku ose për zgjedhje personale. Është e rëndësishme të kesh një shpirt sivëlla në jetë.

Ody, që nuk e pranon vëllain e tij në fillim, mund të besoj tek ai. Dany është po aq i brishtë sa që është gati për gjithçka për të njohur babain e tij dhe që vëllai i tij të bëhet i famshëm si këngëtar duke e nxitur të marrë pjesë në një konkurs televiziv.

Dy aktorët janë shqiptarë të lindur në Greqi, nuk janë profesionistë dhe janë gjetur në fund të një intervistimi të gjatë. “Ata kanë një dëshirë shumë të madhe për të jetuar. Tani e di pse e kam bërë këtë film. Për të rigjetur forcën për të bërë pjesën tjetër të rrugës”, thotë duke qeshur regjisori 49 vjeçar.

HermesNews - ©2014

Dërgo me email | Stampo artikullin