10/05/2014 19:20:32

Suprizat e parazgjedhjeve

Ish-deputeti i AAK-së, Ramiz Kelmendi, i është bashkuar Partisë Demokratike të Kosovës të kryeministrit Hashim Thaçi

PRISHTINË - Partitë politike të Kosovës mobilizohen e përforcohen me prurje të reja para zgjedhjeve parlamentare të parakohshme të 8 qershorit.

Ish-deputeti i AAK-së, Ramiz Kelmendi, i është bashkuar Partisë Demokratike të Kosovës të kryeministrit Hashim Thaçi. Në një konferencë për media të mbajtur sot, ku ishin së bashku, Thaçi tha se Kelmendi po i bashkohet listës fituese të 8 qershorit dhe misionit të ri për zhvillim ekonomik dhe krijim të vendeve të reja të punës.

Kryetari i Lidhjes Demokratike të Kosovës, Isa Mustafa, i ka dëshiruar sot mirëseardhje në LDK, profesorit të universiteteve të Parisit, Valon Murtezaj, të cilin në konferencën për shtyp së bashku e vlerësoi një intelektual me kredenciale ndërkombëtare, i shkolluar në Evropë dhe Amerikë, përfshirë edhe Shkollën Kenedi të Harvardit.

Murtezaj tha se është i nderuar dhe i lumtur mundësinë që ia ka dhënë LDK-ja për të punuar për të mirën e Kosovës, ndërsa shtoi se kryesorja është që zgjedhjet të jenë të drejta dhe demokratike, nga të cilat do të dalin institucione që janë të gatshme që të ballafaqohen me sfidat në vitet e ardhshme.

HermesNews - ©2014

Dërgo me email | Stampo artikullin