26/04/2014 12:51:25

Kosova nderon të vrarët në Gjakovë

Manifestime në qëndër të qytetit për 27 prillin, ditën kur ushtria serbe masakroi 377 shqiptarë

PRISHTINE - Në të ashtëquajturën Lugina e Pikëllimit, në Gjakovë, nesër përkujtohet 27 prilli, dita kur serbët vranë 377 shqiptarë në Mejë. Presidentja e Republikës së Kosovës, Atifete Jahjaga bën sot homazhe në Varrezat e Martirëve në Mejë, ku në 27 prill 1999 asnjëri nga të ndaluarit në rrethimin e hekurt të kolonës së civilëve nuk kishte arritur të dilte i gjallë. Shumica e trupave të viktimave të masakrës në Mejë, janë zhvarrosur nga një varrezë masive në Batajnicë afër Beogradit, në Serbi, ku ishin dërguar nga forcat serbe në përpjekje për të fshehur gjurmët e mizorive në Kosovë. Një varrezë tjetër masive është gjetur dhe po gërmohet në Rudnicë, komuna e Rashkës, në jug të Serbisë, ku mendohet se janë groposur së paku 250 shqiptarë të vrarë e të masakkruar në Kosovë. Përfaqësuesit e Familjeve të Personave të Zhdukur kanë vizituar dje lokacionin e varrezës masive në Rudnicë.

Kosova 15 vjet pas luftës vazhdon të kërkojë zbardhjen e fatit të 1700 qytetarëve të zhdukur, dhe me këtë mesazh fotografitë e të pagjeturve janë rivendur nga familjarët nga 8 marsi i këtij viti në rrethojat e Kuvendit e Qeverisë, në sheshin qendror të Prishtinës.

HermesNews - ©2014

Dërgo me email | Stampo artikullin