24/04/2014 18:55:22

Piktura klasike, artistë nga 1500 – 1900

Ekspozita hapet për publikun më 24 Prill 2014, ora 19.00 dhe do të qëndrojë e hapur deri më 18 Maj 2014

TIRANË - Në Galerinë Kombëtare të Arteve, u zhvillua sot konferenca për shtyp mbi ekspozitën “Piktura klasike, artistë nga 1500 – 1900”.

Në fjalën e tij drejtori i GKA Artan Shabani, i cili ishte edhe ideatori i kësaj ekspozite ndër të tjera nënvizoi rëndësinë e ekspozimit të koleksioneve të fondit të GKA, të cilat njihen pak nga publiku e veçanërisht nga brezat e rinj. Pasi foli për rëndësinë e ekspozimit të këtyre veprave, Shabani premtoi hapjen e ekspozitave të tjera me vepra nga fondi i GKA.

“Ky është një prezantim i një grupi autorësh dhe autorësh anonimë nga fondi i Galerisë Kombëtare të Arteve. Kjo ekspozitë prezantohet për të vlerësuar prestigjin e fondit të Galerisë Kombëtare të Arteve dhe përmban pikturën me temë fetare, natyra të qeta, pejzazhe, portrete dhe kompozime.Ekspozita njeh publikun me një vlerë kohore prej 400 vjetësh, një nga dëshmitë e rralla të këtij intervali që shënjohet në kohën tonë kombëtare. Ajo gjithashtu mbart një vlerë financiare për t’u zbuluar dhe thekson nevojën për zhvillimin e një dijeje eksperte në fushën e artit”, tha Shabani.

Sipas tij, identiteti i kulturës së një kombi matet me shekuj dhe këto janë dëshmi të identitetit tonë, që në këtë rast vijnë nga fondi i pasur i Galerisë Kombëtare. Veprat i përkasin publikut shqiptar dhe publikes shqiptare. Ndaj ftoj të gjithë publikun, artistët, veçanërisht brezin e ri, nxënësit e shkollave, të vijnë dhe të njohin artin klasik të pikturës. Të mësojnë më shumë se si është pikturuar shekuj më parë.piktura klasike ne gka

Sa i takon financimit, Shabani sqaroi se kjo është një ekspozitë e bërë me një kosto jashtëzakonisht të ulët: më pak se 500 euro dhe duhet të falënderoj të gjithë stafin e GKA që ka punuar me përkushtim për realizimin e saj.

Kuratorja e ekspozitës Suzana Varvarica Kuka u shpreh se “kjo ekspozitë vjen si një nismë e drejtorit të Galerisë Kombëtare, Artan Shabani. Qëllimi ishte për të risjellë atë të plotë. Edhe pse disa prej pikturave janë ekspozuar më parë, asnjëherë fondi i autorëve të huaj nuk është ekspozuar në mënyrë kaq të plotë”. Ajo tha se veprat u përzgjodhën në përshtatje me vetë pikturën, temat, subjektet që ruan ky koleksion i artistëve të huaj dhe anonim, me gjendjen e tyre të mirë fizike dhe të disa gjinive si : portreti, natyra e qetë, kompozimi, pejzazhi. Koleksioni prej rreth 40 veprash u përzgjodh të ekspozohet me arsyen që publiku i ri, i kohëve që jetojmë të njihet me këtë koleksion”.

HermesNews - ©2013

Dërgo me email | Stampo artikullin