14/04/2014 12:42:38

Zëdhënësja e Schumi-t: Ka përmirësime të vogla

Zëdhënësja e Michael Schumacher, Sabine Kehm, ka deklaruar për televizionin gjerman ARD se ish-piloti i Formulës 1 po bën “përmirësime të vogla” që nga koha kur mjekët kanë nisur procesin e zgjimit të tij nga koma e induktuar

HermesNews - Gjithsesi, ajo saktësoi se nuk mund të bëhet asnjë parashikim: “Nuk mund të themi se çfarë do të ndodhë pasi këtë gjë nuk na e thonë as mjekët, por ka përmirësime të vogla që neve na lumturojnë shumë.”

Michael Schumacher ndodhet në gjendje kome që pas aksidentit të rëndë me ski që pësoi në alpet franceze në 29 dhjetorin e vitit të kaluar. Që nga ajo kohë ka pasur përpjekje nga njerëz të ndryshëm për t’i bërë foto ish-kampionit të Formulës 1 e për t’i shitur më pas ato tek mediat e interesuara.

Këtë gjë e konfirmoi edhe zëdhënësja e tij: “Që në fillim kishte njerëz që kanë tentuar të hynin në dhomë e t’i bënin foto. Njëri u vesh si prift, ndërsa një tjetër i tha rojeve se ishte i ati i Michael. Ka pasur edhe nga ata që i kanë ofruar para’ familjarëve për disa foto.”

Arbër Meçenovi

Dërgo me email | Stampo artikullin