08/04/2014 23:56:01

Qerimaj shpallet kampion Europe. Godelli nënkampion

Erkand Qerimaj është shpallur kampion i Europës dhe Daniel Godelli nënkampion në kampionatin që po zhvillohet në Telaviv

HermesNews - Erkand Qerimaj është shpallur kampion i Europës dhe Daniel Godelli nënkampion në kampionatin që po zhvillohet në Telaviv. Peshëngritësit shqiptarë kanë marrë të dy sëbashku 6 medalje duke arritur një sukses të madh në garën për peshën deri në 77 kilogramë. Të dy kanë ngritur 349 kilogramë në total, por Qerimaj është renditur i pari pasi ishte 20 gramë më i lehtë se Godelli.

Ata kanë arritur të kalojnë të gjithë kundërshtarët në stilin e shtytjes duke e mbyllur garën me një sfidë mes tyre. Erkand Qerimaj ka marrë 2 medalje të arta dhe 1 bronxi, ndërsa Daniel Godelli 3 argjendi. Pa fat ka qenë Romela Begaj, e cila nuk arriti të përfundonte garën për peshën deri 63 kilogram pasi u dëmtua në shpinë duke mos u klasifikuar në dygarësh. Ervis Tabaku do të jetë peshëngritësi i fundit shqiptar që do të garojë të premten për peshën deri 94 kilogramë.

Arbër Meçenovi

Dërgo me email | Stampo artikullin