18/03/2014 12:46:05

Alfred Mirashi në 450 vjetorin e vdekjes së Mikelanxhelos

Artisti shqiptar Alfred Mirashi merr pjesë në ekspozitën kushtuar 450 vjetorit të Mikelanxhelos

HermesNews - Kanë kaluar 450 vjet nga vdekja e gjeniut të artit italian të periudhës së Humanizmit. Mikelanxhelo, me origjinë nga Toskana, vdiq në moshën 89 vjeçare në vitin 1564 në shtëpinë e tij në Romë ku kaloi 30 vitet e fundit të jetës së tij. Italia celebron 450 vjetorin me një sërë evenimentesh artistike dhe kulturore ku protagonist absolut është arti, në të gjitha degëzimet e tij pikturë, skulpturë, arkitekturë.

Aktivitetet, duke filluar nga muaji shkurt, do të përqendrohen kryesisht në Romë dhe Firence, dy qytetet kryesore ku mjeshtri Buonarroti la gjurmë të veprimtarisë së tij artistike që tashmë janë kthyer në simbole universale të mbarë njerëzimit, përtej kohës, përtej kufinjve.

Kur përmendim Mikelanxhelon na vjen në mendje vetëtimthi “Davidi”, “Krijimi” në Kapela Sistina, “Pietà” në Vatikan, “Moisiu”, e plot vepra të tjera fryt i këtij artisti që përfaqëson në mënyrën tërësore rrymën artistiko-kulturore të Rilindjes dhe Humanizmit. Vazari në përshkrimet e tij e quan “artisti hyjnor”.

Skulptor dhe piktor, veprat e tij ishin shumë të kërkuara, të vlerësuara dhe të shitura që kur artisti ishte ende në jetë ndryshe nga ç’ndodh zakonisht në fushën e artit ku veprat vlerësohen pas shuarjes së mendjes krijuese. Dhe pikërisht kjo i lejonte Mikelanxhelos të blinte mermer për të punuar veprat e tij, i sigurtë se do të ecnin në treg, edhe kur nuk i komisionoheshin nga financues arti të aristokracisë italiane të kohës siç ndodhte zakonisht.

Pasuria e paçmuar me vepra artistike që Italia ka trashëguar nga Mikelanxhelo Buonarroti celebrohet në 450 vjetorin e ndarjes nga jeta të artistit me plot aktivitete nga shkurti deri në maj ku do të përfshihen artista , vepra, ekspozita me famë ndërkombëtare.

Shqipëria do të ketë zërin e saj në nderimet që i bëhen kujtimit të mjeshtrit të madh dhe veprimtarisë së tij me anë të përfaqësimit nga artisti Alfred Mirashi dhe skulptura e tij “Venera”, e cila ekspozohet nga Artour në “Villa la Vedetta” dhe “Villa Fani” në Firence.

Me këtë rast, Artour rikthehet për të dhjetën herë me ekspozita në Firence, kësaj here bëhet fjalë për katër ditë përkushtuar prezantimit dhe përhapjes së artit bashkëkohor dhe protagonistëve të saj në bashkëpunim të ngushtë me Akademinë e Artit dhe Vizatimit të Firences, por edhe shumë bashkëpunime të tjera të cilët premtojnë një ekspozitë dinjitoze dhe të pasur. Ndër to edhe projekti “Unë dhe Mikelanxhelo” kushtuar gjeniut humanist.

Artisti shqiptar Alfred Mirashi Milot, siç u tha edhe më lart, do të ekspozojë skulpturën e tij “Venera”. E cilësuar nga kritikët si një vepër që mbart në vetvete dhe përcjell frymën e kulturës mesdhetare me statujat klasike të Greqisë së lashtë dhe ngjyra e drita që trasmetojnë entuziazmin me të cilin është punuar, si dhe “çelësi”, elementi emblematik që shoqëron me dritëhijet e domethënies së tij pothuajse të gjitha veprat e artistit, duke u kthyer në një medium mes botës se njeriut dhe botës së pashterueshme të artit.

Në veprat e Alfredit mbizotëron nevoja për të komunikuar, për të gjetur nyjet lidhëse dhe pikat e shkëmbimit mes botëve të ndryshme. Pikërisht çelësi, objekti emblematik, kthehet në ndërmjetës pasi nuk bëhet më fjalë për të hapur një derë reale, përkundrazi për të shembur njëherë e përgjithmonë të gjitha pengesat apo muret ndarëse që pengojnë lidhjen dhe shkëmbimin e drejtëpërdrejtë e të sinqertë mesh njerëzish dhe kulturash të ndryshme.

Jetojmë në shekullin e mërgimeve masive, në një botë në lëvizje marramendëse, si rrjedhim edhe kultura tradicionale dhe arti duhet të hapen e të kthehen në pika takimi mes botëkuptimesh e horizontesh sa të largëta po aq edhe të ndërthurura ngushtë mes tyre.

Alfred Mirashi ka patur mundësinë të përjetojë në vetë të parë çdo të thotë dhe cilat janë peripecitë dhe përfitimet nga takimi mes dy kulturash të ndryshme, të afërta por edhe të largëta, si ajo shqiptare dhe italiane, duke qenë se jeta e tij , si ajo e shumë shqiptarëve të tjerë, e bëri të provonte mërgimin. Ndaj veprat e tij janë fryt i një eksplorimi të botës me sy kurioz dhe entuziast ndaj të resë, kulturave të ndryshme, botëve të panjohura.

Daniela Vathi

Dërgo me email | Stampo artikullin