06/03/2014 22:30:36

Federata Serbe letër Blatter-it 'Anulloni vendimin për Kosovën'

Federata e Futbollit e Serbisë i ka dërguar një letër presidentit të FIFA-së, Sepp Blatter

HermesNews - Federata e Futbollit e Serbisë i ka dërguar një letër presidentit të FIFA-së, Sepp Blatter. Serbët kërkojnë që ta anulojnë vendimin që Kosova të luaj miqësore, pasi nuk i ka respektuar modalitetet.

Serbët janë duke i bërë presion FIFA-s për të anulluar vendimin që Kosova të luaj miqësore, pasi Federata e Futbollit e Serbisë pretendon se Federata e Futbollit Kosovës nuk i është përmbajtur rregullave të caktuara nga FIFA. Serbët i kanë dërguar një letër proteste Presidentit të Fifa-së, Sepp Blatter, duke pretenduar se Kosova ka lejuar të përdori simbolet shtetërore, himnin dhe simbolet e tjera.

“Është e qartë se kemi prova që lojtarët vendës mbanin në fanellë emblemën e Federatës së Futbollit të Kosovës. Kjo është befasuese, duke e pasur parasysh se drejtuesit e ndeshjes është dashur ta vërenin këtë, në bazë të vendimit të marrë nga FIFA”, thuhet në ankesën e FSS-së.

“Ndër të tjera, loja është vëzhguar nga vëzhguesi special i FIFA’s, i cili nuk ka reaguar po ashtu. Federata Serbe kërkon nisjen e procedurave disiplinore ndaj të gjithë zyrtarëve të lojës”, shkruhet në reagim.

Drejtuesit e futbollit serbë presin përgjigje nga FIFA, nga e cila pret sanksionime për shkak të mos respektimit të modaliteteve.

“FSS distancohet nga vendimet e Komisionit për Çështje Urgjente dhe FS kërkon revokimin apo anulimin e vendimit të miqësoreve të Kosovës”, përfundon reagimi i FSS’së. Na ndiqni dhe në Facebook dhe Twitter

Arbër Meçenovi

Dërgo me email | Stampo artikullin