05/03/2014 18:06:04

Dogana nuk ka shtuar asnjë taksë

Një ditë më parë disa drejtues të makinave deklaruan se Kosova ka vendosur taksën 40 euro për mallrat që shkojnë drejt Kosovë

TIRANË - Dogana e Kosovës njofton se raportimet lidhur me aplikimin e taksës prej 40 eurove, nuk janë të vërteta. Në një njoftim për shtyp Dogana e Kosovës bën të ditur se nuk ka kompetenca ligjore për të shtuar ndonjë taksë, përveç taksave të cilat aprovohen nga Qeveria e Republikës së Kosovës dhe Kuvendi i Republikës së Kosovës.

Dogana informon se nuk ka aplikim të ndonjë takse, por vetëm pezullimi i procedurave të thjeshtëzuara deri në përfundimin e procesit të ri-licensimit, nëpër të cilin do të kalojnë të gjithë aplikuesit.

“Informatat e dhëna nga drejtuesit e maunave në media, lidhur me pretendimet për aplikimin e taksës janë të pavërteta, dhe po tentojnë të shfrytëzohen nga një grup i vogël i tregtarëve (importues nga Kosova) për qëllime të tyre”, thuhet në njoftimin zyrtar.

Dogana në bashkëpunim me Odën ekonomike të Kosovës, Aleancën e Biznesit dhe Odën Amerikane në Kosovë kanë rënë dakord më parë që të ndërrojnë procedurat e thjeshtëzuara të importit, në mënyrë që të gjitha procedurat të jenë në përputhje me Kodin e Doganave dhe Akcizës dhe praktikave më të mira europiane.

Prandaj, citohet në njoftim, edhe tani Dogana ka pezulluar sistemin e importit të thjeshtëzuar që ka qenë duke u shfrytëzuar nga këto kompani, deri në ri-licensimin e tyre, sipas udhëzimit administrativ, i cili ka hyrë në fuqi në muajin shkurt të këtij viti.

“Ky është një vendim i përbashkët, i marrë në Këshillin Konsultativ pranë Ministrisë së Financave, këshill që përbëhet nga Dogana e Kosovës, Administrata Tatimore e Kosovës, Oda Ekonomike e Kosovës, Oda Ekonomike Amerikane dhe Aleanca Kosovare e Biznesit”, bëhet e ditur.
Dogana e Kosovës është e përkushtuar për rend dhe ligj duke krijuar konkurrencë të barabartë për të gjithë importuesit dhe mallrat që importohen në vendin tonë.

Një ditë më parë disa drejtues të makinave deklaruan se Kosova ka vendosur taksën 40 euro për mallrat që shkojnë drejt Kosovës.

HermesNews - ©2014

Dërgo me email | Stampo artikullin