02/03/2014 09:29:59

Promovohet vëllimi 'Nusja me Duvak' e Lulash Palushaj

Përmes gegnishtes letrare që lëvron, në esetë e këtij vëllimi, përmes portretizimeve të dhjetra e qindra personazheve, ai ka arritur të portretizojë shpirtin liridashës të kësaj treve të Shqipërisë sonë

SHKODER - Sot në një nga mjediset kryesore të hotel Rozafës në Shkodër, klubi i shkrimtarëve në Shkodër organizoi promovimin e librit "Nusja me duvak të bardhë" të prof. Lulash Palushaj.

Morën pjesë mjaft shkrimtarë e artistë nga Shkodra, nga trevat shqiptare në Mal të Zi ku dhe ka lindur autori 70 vjet më parë e nga diaspora ku ai jeton, por edhe të klubit të shkrimtarëve të Durrësit, si të ftuar.

I konceptuar edhe në formën e spektaklit artistik, oratorët që e morën fjalën, shkrimtarë, kritikë, miq e shokë të autorit, theksuan disa nga risitë që ai sjell e mesazhet që përcjell.

Autori nuk është rishtar në fushën e krijimtarisë: në promovimin e sotëm ai vjen si autor i disa vëllimeve, në poezi e prozë. Mbrojtja e vatrës së shtëpisë
dhe e vatrës së atdheut, të Malësisë së Madhe, bir i së cilës ai është, të gjuhës e të racës sonë, janë disa nga kolonat ku mbahet ky vëllim.

Edhe pse Palushaj e përshkruan Malësinë e Madhe në rrjedhën e 5 shekujve të fundit, me personazhe historikë të njohur e të panjohur, shfaqet si historian e gjeograf, shkrimtar, gjuhëtar e etnolog, por mbi të gjitha si atdhetar.

Përmes gegnishtes letrare që lëvron, në esetë e këtij vëllimi, përmes portretizimeve të dhjetra e qindra personazheve, ai ka arritur të portretizojë shpirtin liridashës të kësaj treve të Shqipërisë sonë, të depërtojë në botën e saj të brendshme, në traditat e virtytet që u flasin të gjithëve e veçmas brezit të ri që ta duam këtë dhé më shumë se vehten tonë.

Në fund autori Palushaj falenderoi të pranishmit për pjesëmarrjen, analizat e vlerësimet, u dhuroi libra me autograf dhe, për nder të tyre, në po këtë hotel shtroi një koktejl. //HermesNews - ©2014// Na ndiqni dhe në Facebook dhe Twitter

Skender Temali

Dërgo me email | Stampo artikullin