24/02/2014 09:52:24

Torta Mimoza

nga Brunhilda Çela

Sekretet e aromave të Brunhildës Sot si ditë pranvere që ishte dhe meqë isha pushim, pata frymëzim për të bërë diçka të bukur pranverore. Para ca kohëve në youtube pashë një video për tortën mimoza nga giallo zafferano (foto).

Më pëlqeu shumë dhe meqë mimozat i adhuroj e me gjendeshin atë ditë në shtëpi thashë po provoj tortën mimoza sot. Recetën e ndryshova pak duke e bërë kremin pak më të lehtë, i hoqa një shtresë me krem pana edhe pse dilte më e bukur ashtu, por mendova sa të kem mundësi ti reduktoj lyrërat e tepërta që ka kjo recetë.

Torta ka shumë vezë, bombë kalorike dhe nuk ishte nevoja gjithë ai krem pana. Bëra edhe ca ndryshime në rradhën e rrahjes se pandispanjës, pasi jam mësuar me metodën time dhe ia kam marrë dorën. Receta që nxora unë është kjo:

Për 2 x pandispanja me 6 kokrra veze secila, 6 të bardha veze
6 të verdha
miell 100 gr
40 gr niseshte
sheqer 100-110 gr
pak lekurë portokalli ose limoni
1 filxhan të vogël kafeje liker portokalli, une vura liker ftoi (të cilin e kam përgatitur bvetë në kohën e ftonjve dhe ka një aromë fantastike), 50 gr sheqer, 50 ml ujë ose komposto ananasi

Për kremin: -8 të verdha veze, 1 bishtajë vaniljeje
80 gr niseshte
300 ml qumësht
300 ml pana
1 krem pana të rrahur 250 ml ose qimiq 250 ml (qimiq është një lloj pana dietike që shitet në Austri me përqindje të ulet lyre)
sheqer 80 gr
komposto ananasi te grirë shume imët në kubikë të vegjël 150 gr. Nëse nuk e pëlqeni shijen e ananasit mund të mos e vini.

Nëse keni qejf të luani me ngjyra mund të përdorni marzipan të gatshëm të ngjyrosur të verdhë dhe të gjelbër dhe dekoroni lart, unë doja po nuk më doli koha dhe e dekorova vetëm me lulet e mimozës lart. Përgatitja: Në fillim përgatita pandispanjat. Meqë ena që kam për rrahje nuk është e madhe i bëra vec e vec pandispanjat: pra rraha 6 të bardhat me sheqerin sa bëhet shkumë, një marengë e qëndrueshme. Pastaj shtojmë të verdhat një nga një duke vazhduar rrahjen në mikser.

Gjithsej zgjat nja 8 minuta rrahja. Përziej miellin me niseshten dhe e kaloj në sitë të imët. Pastaj përzierjen e situr ja shtoj masës lugë - lugë dhe nuk e rrahim më me mixer. E përziejmë duke levizur lugën vertikalisht dhe me shumë kujdes që masa të mos ulet. Furrën e sobës e ngrohim më parë në 180 gradë. Masën e pandispanjës e vë në një tepsi të rrumbullakët me diametër 24 cm. Tepsisë i vëmë letër pjekëse poshtë dhe anët i lyejmë me pak gjalpë. Ndërkohë unë bëra edhe pandispanjën tjetër dhe të gjithë rradhën e punës e bëra njëlloj.

Për kremin veprova në këtë mënyrë: Në mikser rrah të verdhat e vezës me sheqerin dhe niseshtenë sa të bëhen krem. Në një tenxhere,në zjarr të ngadaltë, vë qumështin me ajkën (kremin pana), dhe bishtajën e vaniljes të cilën e kam hapur më parë dhe e kam gërruar mirë tulin e brendshëm aromatik. Megjithatë bishtajën nuk e hedh por ja vë qumështit brenda që të dali e gjithë aroma e vaniljes.

Kur qumështi merr valë hedh një pjesë të qumështit brenda tek të verdhat e vezës së rrahur me sheqerin dhe niseshtenë dhe i përziej të gjitha bashkë me mixer në shpejtësi të vogël në mënyrë që mos të na spërkasë. Pastaj e hedhim tek pjesa tjetër e qumështit duke rrahur vazhdimisht, pandërprerë dhe jo në shumë nxehtësi se veza pritet. Ndërkohë që masa trashet dhe krijon fllucka është gati.I vëmë një folie plastike sipër që mos të zëri kore dhe e leme të ftohet.

Ndërkohë presim pandispanjën e ftohur në mes. Dalin gjithësej 4 copë.Njërën pjesë e pastrojmë mirë anash dhe e presim në kubikë të vegjël.Këto na duhen për zbukurimin lart të tortës.

Pjesët e prera të pandispanjës( 3 copët e ngelura) i lyejmë me një shurup që kemi përgatitur duke përzier likerin e ftoit me sheqerin dhe ujin ose komposton e ananasit. Këto i lyejmë me një furcë guzhine derisa të mbarojë i gjithë shurupi pra lyejmë të gjitha pjesët. Kremi i ftohur përzihet me krem pana të rrahur (në rastin tim me qimiq të rrahur), në mikser. Nëse duam i fusim brenda edhe komposton e ananasit të grirë imët.

Bëjmë shtrimin e tortës në formën e posacme të saj. Pandispanjë-krem-pandispanjë-krem. Heqim formën dhe lyejmë edhe anët mirë me krem.
Lart hedhim copat kubike të pandispanjës dhe anash gjithashtu. E leme per rreth 1 orë ne frigorifer që të marri më shumë shije dhe të ndihen më mirë aromat dhe është gati për tu servirur.Ju bëftë mirë ! Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin