04/02/2014 18:41:01

Ndahet nga jeta profesor Ibrahim Madhi

Profesor Ibrahim Madhi u nda nga jeta pas një sëmundje të rëndë dhe homazhet në nderim të tij do të zhvillohen të mërkurën në Akademinë e Arteve në Tiranë

TIRANE - Ka ndërruar jetë të martën në Tiranë, në moshën 69 vjeçare, Artisti i Popullit, Ibrahim Madhi. Profesor Ibrahim Madhi u nda nga jeta pas një sëmundje të rëndë dhe homazhet në nderim të tij do të zhvillohen të mërkurën në Akademinë e Arteve në Tiranë, ku për vite me radhë shërbeu si pedagog i violinës. "Ibrahim Madhi mik i mirë kohësh të vjetra, violinist e pijetar virtuoz. Iku pa zhurmë duke lënë pas shijen e muzikës e të bisedës pa zhurme", ka shkruar Kryeministri Edi Rama në rrjetin social Facebook, menjëherë sapo ka mësuar lajmin e ndarjes nga jeta të artistit të madh. I njohur si një ndër themeluesit e muzikës shqiptare, Ibrahim Madhi vlerësohet nga kolegët e tij si një figurë me peshë të madhe në jetën muzikore shqiptare. I vlerësuar disa herë me çmime të rëndësishme kombëtare, në vitin 1999 ai fitoi titullin Profesor. Për herë të fundit u shfaq në skenë në koncertin për 100 vjetorin e Pavarësisë, me orkestrën e harqeve të cilën e kishte themeluar vetë në vitet ’70 e që sot nuk ekziston më, por që violinisti virtuoz e rigjeneroi enkas për atë jubile të madh të shqiptarëve. Na ndiqni dhe në Facebook dhe Twitter

HermesNews - ©2014

Dërgo me email | Stampo artikullin