05/01/2014 17:45:59

Portret, Pantera zezë portugeze

Jeta dhe karriera e Eusebios

LISBONË - Eusebio, ”pantera e zezë” e ardhur nga Mozambiku për t’i dhënë lavdi Benfikës së viteve gjashtëdhjetë, i cili vdiq sot në moshën 71 vjeç, konsiderohej si futbollisti më i mirë portugez i të gjitha kohërave.
Eusebio da Silva Ferreira kishte lindur më 25 janar 1942 në Maputo, kryeqyteti i Mozambikut, në atë kohë koloni portugeze.

I rekrutuar në moshën 19 vjeç nga klubi i futbollit të Lisbonës Benfika për cilësitë e tij të jashtëzakonshme teknike dhe fizike, ai fiton në vitin 1962 Kupën e kampionëve të Evropës përballë Realit të Madridit të Di Stefanos.
Të 733 golat e shënuar gjatë karrierës së tij flasin shumë për këtë sulmues të rrezikshëm, dy herë golashënuesi më i mirë i Evropës (1967/68 dhe 1972/73), i njohur me nofkën “pantera e zezë” ose thjesht “mbreti”.

Duke mos u lejuar nga regjimi totalitar i Antonio Salazar të nënshkruante për një klub të huaj, Eusebio grumbullon titujt me Benfikën (11 kampionate kombëtare, pesë Kupa të Portugalisë) merr pjesë në tre finale të tjera të Kupës së Kampionëve.

Fitues i Topit të Artë në vitin 1965, ai bëhet futbollisti i parë me ngjyrë që e merr këtë çmim, akorduar në atë kohë nga revista ”France Football” për lojtarin më të mirë evropian.

Forca dhe shkathtësia e tij do të shkruajnë gjithashtu një nga faqet e historisë së ekipit të Portugalisë, që zë vendin e tretë në Kupën e botës në vitin 1966.

Golashënuesi më i mirë i turneut me nëntë fitore, Eusebio konsiderohet gjithashtu si lojtari më i mirë i garës. Rekordi i tij me 41 gola në 64 ndeshje për ”Seleçao” (shën.përkth. ekipi i futbollit të Brazilit) do të sfidohet vetëm në vitin 2005, nga Pedro Pauleta.

Eusebio largohet nga Benfica në vitin 1975 dhe “del në pension” tre vjet më vonë, pas qëndrimeve të shkurtëra në disa klube amerikane dhe në ekipe modeste portugeze.

Ai bëhet atëherë ambasador i Benfikës dhe i Federatës portugeze të futbollit. Duke qenë gjithmonë i pranishëm gjatë takimeve të mëdha, shumë breza lojtarësh kanë mundur kështu ta takojnë legjendën.

Arber Mecenovi

Dërgo me email | Stampo artikullin