02/01/2014 15:06:50

Arian Kalari ekspozitë me skulptura në Brescia

Nga data 11 deri më 29 janar do të mbahet në sallat e AAB në Brescia(Itali) ekspozita e skulptorit shqiptar Arian Kalari

ITALI- Nga data 11 deri më 29 janar do të mbahet në sallat e AAB në Brescia(Itali) ekspozita e skulptorit shqiptar Arian Kalari.

Arian Kalari lindi në Tiranë ku kreu studimet në Liceun Artistik dhe më pas u pranua në Akademinë e Arteve të Bukura në Tiranë. Në vitin 1988 u diplomua në skulpturë monumentale duke arritur një sukses të ndjeshëm në të gjithë vendin.

Si shumë artistë të tjerë të viteve ’90 në Shqipëri ishte kundër regjimit komunist, i karakterizuar prej një çensure kurrsesi të pranueshme nga arti, i cili është shprehje e drejtpërdrejtë e lirisë së shpirtit artistik. Ndaj u detyrua të largohej nga atdheu duke kërkuar azil politik në Ambasadën Italiane.

Në fillimet e tij në Itali u vendos në Firenze-n e bukur art-dashëse që do të lërë gjurmët e saj artistike në karrierën e skulptorit shqiptar, më pas kaloi në Volterra. Të dy qytetet italian, të njohur për pasurinë në arte ndër shekuj, u kthyen shumë shpejt në pika referimi për artistin ndoshta edhe për shkak të udhëtim-hulumtimeve të shumta e të njëpasnjëshme në kërkim të materialeve më të përshtatshme për veprat e tij.

Aktualisht artisti jeton në Volterra, ku jep leksione skulpture dhe vizatimi. Karriera e tij në Itali ka lulëzuar duke i ofruar artistit mundësinë për të shprehur lirshëm talentin dhe pasionin me të cilin i përkushtohet artit. Shumë nga veprat e tij i gjejmë të ekspozuara si në Galerinë Kombëtare në Tiranë po ashtu edhe në shumë koleksione private europiane dhe amerikane, duke i dhënë artit të tij një dimension kozmopolit ndaj të cilit Shqipëria duhet të jetë mirënjohëse.

Ekspozita që do të mbahet në qytetin italian të Brescia-s përgjatë muajit të janarit titullohet “Transformimi i ngadaltë i njeriut”. Do të ekspozohen rreth njëzet vepra të artistit, midis tyre vepra në mermer, në bronz dhe gips.
Në vizionin artistik të Kalarit ka ndikuar ndjeshëm mitologjia dhe tradita shekullore e skulpturës italiane duke nisur që nga e “pa-mbaruara” mikelanxholeske.

Katalogu i ekspozitës është kuruar nga kritiku italian Maurizio Bernardelli Curuz, i cili shprehet se punimet dhe karakteristikat e skulturave të ekspozuara nga Arian Kalari na nxisin të mendojmë më thellë rreth të papriturave të jetës, dashamirësisë, pëshpërimave, vetëtimave apo heshtjeve të Olimpit, duke prekur kështu pjesë të shpirtit në pritje për t’u vaditur nga uji shpirtëror që inkurajon jetën dhe tokën duke u rikthyer atyre një shenjtërim të humbur.

Daniela Vathi

Dërgo me email | Stampo artikullin