18/12/2013 16:25:33

100 vjet ''Hylli i Dritës''

Përkujtohet Akademia Shkencore Ndërkombëtare

SHKODËR - Fakulteti i Shkencave Shoqërore, Instituti i Studimeve Albanologjike me mbështetjen e Konsullatës Austriake të Nderit, organizuan sot në një nga sallat e Universitetit “Luigj Gurakuqi” të Shkodrës aktivitetin me temë "Akademinë shkencore ndërkombëtare “100 vjet “Hylli i Dritës”.

Rektori i Universitetit, Prof. Dr. Artan Haxhi, tha se kjo veprimtari zhvillohet në kuadër të 100-vjetorit të daljes së numrit të parë të revistës “Hylli i Dritës”, këtij periodiku të rëndësishëm kulturor, filologjik, letrar, etj. Sipas tij, botimi i këtij periodiku ishte një ngjarje e shënuar jo vetëm për Shkodrën, por për gjithë Shqipërinë.

Ai theksoi se “si sot një shekull më parë, kur vendi ynë sapo kishte nisur të qeverisej si shtet i pavarur pas një robërie të gjatë, feksi drita e një reviste që u quajt në mënyrë emblematike “Hyll”, me shpresë në Providencën Hyjnore dhe në të ardhmen e atdheut, qe do të rilindte si Feniksi nga hiri i tij.

Mendjet më të ndritura të urdhrit françeskan, një urdhër aq popullor në Shqipëri, me nismën e poetit emërmadh, Fishtës, morën guximin të nxjerrin në ballë të kulturës shqiptare një revistë të një niveli kulturor evropian, siç u bë shpejt “Hylli i Dritës”.

Pas përshendetjeve të rastit të mbajtura edhe nga ana e Dekanes së Fakultetit të Shkencave Shoqërore, prof.as.dr. Mimoza Priku, Konsulli i Nderi i Austrisë në Shkodër Gjergj Leqejza, prof. dr.Hysni Matoshi, Drejtor i Institutit Albanologjik të Prishtinës, aktiviteti ka vijuar me punimet e kësaj akademie, të ndara në tri seanca. Ne to u mbajten 33 kumtesa nga profesorë dhe akademikë nga Shkodra, Tirana, Prishtina, Shkupi, Beogradi, etj, që hodhen dritë mbi aktivitetin e "Hyllit të Dritës". Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin