13/12/2013 14:03:27

Zbulohet nje varr masiv ne Rashke

Eshtrat e te masakruarve nga lufta ne Kosove

KOSOVE- Sot rreth ekipet e ekspertëve nga Departamenti kosovar i Mjekësisë Ligjore dhe i atyre të EULEX-it, pas gërmimeve të bëra në zonen, ku dyshohet që mund të ketë trupa të viktimave të vrarë, në Rashkë, Serbi, kanë gjetur rroba dhe eshtra të viktimave të vrarë nga lufta e fundit në Kosovë.

Udhëheqësi i ekspertëve të Departamentit të Mjekësisë Ligjore, Arsim Gërxhaliu, tha se "pas punës së vazhdueshme të gërmimit, në afërsi të një objekti kemi gjetur eshtra dhe rroba të viktimave të vrarë nga lufta e fundit në Kosovë".

Sipas Gerxhaliut, gërmimet do të vazhdojnë ende në këtë zonë, ndërkohë pritet që të rrëzohet edhe një objekt nën themelet e të cilit dyshohet që ka ende mbetje të trupa të viktimave. Ndërkohë, gjithnjë sipas burimeve zyrtare, sapo njoftohemi se me rastin e gjetjes së mbetjeve mortore në lokacionin e Rashkës, Komisioni Qeveritar për Persona të Pagjetur i Kosovës do mbajë pasdite një konferencë për shtyp.

Kanë vazhduar ditëve të fundit gërmimet në Rashkë, atje ku është punuar edhe para dy muajve. Në 20 tetor, përfaqësuesit e Komisionit Qeveritar të Kosovës për Persona të Zhdukur kanë njoftuar se gërmimet vlerësuese të filluara në 17 tetor në fshatin Rudincë, komuna e Rashkës në Serbi, ishin ndërprerë një ditë më parë nga ana e autoriteteve serbe deri në një vendim të radhës nga institucionet kompetente të Serbisë. Kosova 14 vjet pas luftës vazhdon të kërkojë zbardhjen e fatit të më shumë se 1700 qytetarëve të saj të zhdukur.

Në maj të vitit 2010 Komisioni Qeveritar i Prishtinës për Persona të Pagjetur deklaronte se ka informacione për më se 450 shqiptarë kosovarë të groposur në rajonin e Rudnicës afër Rashkës në Serbi, pranë kufirit verior të Kosovës, ku Beogradi njoftonte zbulimin e varrezës masive me rreth 250 trupa.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin