08/12/2013 15:45:04

Qeveria plan per turizmin ne vend

Hapet 'Panairi i Turizmit'. E ardhmja e vendit

TIRANE- Agjencia Kombëtare e Turizmit dhe Ministria e Zhvillimit Urban dhe Turizmit, organizuan sot për herë të parë në Shqipëri Panairin e Turizmit Malor, që synon të vendosë një traditë të promovimit të turizmit dimëror në vendin tonë.

Në fjalën e hapjes, zv/ministri i Zhvillimit Urban dhe Turizmit, Gjon Radovani, vlerësoi organizimin e një panairi të tillë për të promovuar dhe zhvilluar kapacitetet për turizmin dimëror në Shqipëri. Ai tha se , Shqipëria ka aplikuar më shumë gjatë këtyre viteve turizmin veror, me një kohëzgjatje 6-8 javë, prandaj turizmi dimëror duhet të shërbejë edhe për zgjatjen e sezonit turistik dhe tërheqjen e sa më shumë turistëve të huaj. Zv/Ministri theksoi se një nga pasuritë më të mëdha që ka Shqipëri është natyra, prandaj potencialet që kemi në fushën e turizmit duhet të shfrytëzohen për të gjeneruar të ardhura dhe punësim.

Në fjalën e saj, Drejtoresha e Përgjithshme e Agjencisë Kombëtare të Turizmit, Julinda Dhame, u shpreh se Shqipëria është një destinacion me potenciale të konsiderueshme për zhvillimin e turizmit malor, e favorizuar nga terreni dhe nga kushtet natyrore. "Turizmi dimëror në vendin tonë ofron kontrastet e relievit alpin, ujëvarave, bimësisë së dendur, livadheve e sidomos ngjyrave, për të vazhduar më tej me shtëpitë karasteristike të zonës, gatimet tradicionale, të ndërthurura me mikpritjen, por edhe shumë aktivitete argëtuese, të cilat i bëjnë pushimet e gjithsecilit të paharrueshme dhe mbresëlënëse", theksoi Drejtoresha e AKT-së.

I pranishëm në ceremoninë e hapjes së panairit ishte edhe zv/kryeministri, Niko Peleshi, i cili theksoi se në sektorin e turizmit Shqipëria ka mbetur mbrapa në krahasim me disa vende të rajonit, prandaj tha ai "tani është koha të ndërtojmë një aleancë të re mes qeverisë qendrore, qeverisjes vendore dhe operatorëve privatë për ta zhvilluar turizmin me një plan konkret." "Ekonomia shqiptare nuk mund të zhvillohet më përmes rritjes së borxhit dhe të ardhurat që vijnë nga emigrantët. Nuk kemi rrugë tjetër veçse të zhvillojmë ekonominë, të mbështesim investimet private, të zhvillojmë sektorin e turizmit, me qëllim gjenerimin e të ardhurave dhe hapjen e vendeve të punës," tha zv/kryeministri Peleshi.

Panairi i Turizmit Malor, i hapur ditën e dielë, është konceptuar edhe si një vendtakimi ndërmjet operatorëve turistikë, njësive akomoduese dhe restoranteve të ngritura në zonat turistike malore, përfaqësuesve të projekteve të ndryshme që operojnë në këto zona, si dhe federatave të sporteve dimërore dhe atyre malore.

Një hapësirë e veçantë në Panair i është kushtuar një forumi të tipit "Business to Business" (Biznesi për Biznesin), ku aktorët kryesorë të fushës kanë zhvilluar diskutime dhe kanë ndarë eksperiencat e tyre për promovimin e mëtejshëm të turizmit dimëror në Shqipëri.

Në këtë Panair ishin të përfaqësuar me stenda njësitë e qeverisjes vendore me potenciale për turizmin malor, agjencitë dhe operatorët turistikë, federatat e sporteve dimërore, shoqatat, si edhe hotelet, njësitë akomoduese dhe restorantet në zonat ku turizmi malor është më i zhvilluar.
Na ndiqni dhe në Facebook dhe Twitter

HermesNews-©2013

Dërgo me email | Stampo artikullin