30/11/2013 12:17:47

Teqja e ''Baba Xhemalit'', vendi i pelegrinazhit

Teqeja e Baba Xhemalit u ndërtua në vitin 1929 mbi themelet e teqesë së Baba Ali Horosanit

ELBASAN - Shumë vizitorë jo vetëm nga Shqipëria, por edhe nga vende të ndryshme të botës, të cilëve u bie rasti që të kalojnë në qytetin e Elbasanit, ndalen çdo ditë në teqenë e Baba Xhemalit, që ndodhet në periferi të këtij qyteti, shumë pranë varrezave publike.

Teqeja e Baba Xhemalit u ndërtua në vitin 1929 mbi themelet e teqesë së Baba Ali Horosanit, i cili u vra në Elbasan në vitin 1862. Në atë kohë Baba Xhemali, një vjershëtar, dijetar, i lindur në Stamboll, pasi kishte shërbyer në Bagdad e në Stamboll u vendos në Elbasan, ku dhe ndërtoi objektin për besimtarët e sektit bektashian.

Baba Xhemali, 20 vjet drejtues teqeje/ Në atë kohë, Baba Xhemali mori informacione se në regjistrat e vjetër të vakëfeve në Elbasan figuronte një copë trualli me emër "Teqja e baba Ali Horosanit". Mbi këtë informatë baba Xhemali vendosi të blejë truallin për 800 franga ari, ku dhe ngriti teqenë që sot është një vend pelegrinazhi jo vetëm për besimtarët, por edhe për shumë vizitorë.

Bazuar në dokumentet që ekzistojnë lidhur me këtë objekt fetar mësohet se gjatë ndërtimit të teqesë së Baba Xhemalit, dolën në dritë edhe rrënojat e një tyrbeje që ndodhej pranë ish-teqesë së Baba Aliut. Aty u gjet dhe një gur varri, në të cilin ishin shkruar disa vargje që tregonin për të zotin e teqesë, Ali Baba si dhe ditën e lindjes dhe vdekjes së tij.

Baba Xhemali bleu dhe 6 dynym tokë rreth truallit të teqesë, të cilën e mbolli me pemë të ndryshme frutore. Aty ai përhapi idetë bektashiane, deri në 28 shtator të vitit 1949, kur dhe ndërroi jetë për t’u prehur pranë tyrbes së Ali Horosanit, të cilën e rindërtoi vetë. Baba Xhemali kishte një popullaritet të madh tek besimtarët, të cilët e shihnin atë si shërues të shumë problemeve. Pas vdekjes së tij, deri në vitin 1967 kur regjimi komunist mbylli të gjitha objektet e kultit, teqeja u drejtua nga disa pasues.

Me vendosjen e demokracisë, Teqeja e Baba Xhemalit ishte e para që u hap në Elbasan, në 14 qershor të vitit 1993, nga Baba Sherifi, tyrbja e të cilit ndodhet pranë asaj të Baba Ali Horosanit dhe Baba Xhemalit.

"Është mirë të shkosh një herë në javë e të prekësh varret ku ndodhen eshtrat e baballarëve", thotë kryetari i bashkisë së Elbasanit, Qazim Sejdini, i cili nuk mungon në rastet kur në këtë teqe kryhen ritet e Nevruzit apo dita e Ashures. Familja ime, vijon ai, nuk është e sektit bektashi, por mbaj mend se nëna ime dhe në kohën e komunizmit, shkonte dhe ndizte gjithnjë qiri. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin