30/11/2013 11:38:20

Durres, shkollat pa skulptura

Monumenti mes gjelbërimit në oborrin e shkollës është kthyer në një pjesë të rëndësishme të kompleksit të pushimit

DURRËS - Në oborret e shkollave të Durrësit mungojnë thuajse plotësisht skulpturat e parkut. Shkolla “Vasil Ziu”, pranë rrugës “Aleksandër Goga”, bën një përjashtim dhe në oborrin e saj që prej 25 vjetësh vazhdon të qëndrojë monumenti “Dy gjelat mbi pus”, një vepër që mban firmën e skulptorit Alfred Kedhi, një nga ish-mësuesit e kësaj shkolle.

“Jam i kënaqur që mësuesit dhe nxënësit e shkollës kujdesen për të. E kemi ndërtuar së bashku në vitin 1987", thotë Kedhi. Ndoshta mesazhi i dy gjelave që ngrefosen mbi një pus është jo vetëm i këndshëm artistikisht, por edhe i qartë për fëmijët e sotshëm mjaft inteligjentë, thotë skulptori Alfred Kedhi, i cili pasi ka përfunduar edhe studimet në Akademinë e Breras, vazhdon të jetojë dhe të punojë në Itali.

Monumenti mes gjelbërimit në oborrin e shkollës është kthyer në një pjesë të rëndësishme të kompleksit të pushimit në oborrin e shkollës pranë qendrës së Durrësit. Por në shkollat e tjera situata është e ndryshme.

Veprat me karakter historik apo artistik numërohen me gishtat e dorës, mes më shumë se 35 shkollash të mesme e 9-vjeçare, publike apo private që janë ngritur në qytetin me 210 mijë banorë.

20 vjet më parë nga oborret u hoqën bustet e dëshmorëve të luftës, duke ndryshuar njëkohësisht edhe emrat që ata u kishin dhënë shkollave për vite me radhë. Aktualisht janë të pakta shkollat që kanë skulptura parku në oborret e tyre. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin