26/11/2013 17:29:59

Si të ngrohësh një dhomë me vetëm 10 cent

Eshtë vërtetë e mundur të ngrohësh një dhomë apo një zyrë me vetëm 10 cent në ditë?

HermesNews- Me ardhjen e dimrit dhe rënien e temperaturave, nevojitet gjithnjë e më shumë një sistem ngrohjeje efikas dhe sa më pak kushtues. Eshtë vërtetë e mundur të ngrohësh një dhomë apo një zyrë me vetëm 10 cent në ditë?

Mesa duket po. Idea lindi nga një gazetar, Dylan Winter, i cili krijoi një sistem ngrohjeje me sende të thjeshta shtëpiake si për shembull një tabaka, dy vazo lulesh dhe ca qirinj.

Sistemi është shumë i thjeshtë. Mjafton të vendosen qirinjtë në një tabaka prej metali dhe mbi të vendosen dy vazot (prej balte)njëra pas tjetrës duke mbledhur brënda tyre kështu qirinjtë e ndezur. Cmimi i materialeve që nevojiten për eksperimentin shkon deri në pak euro.

Qirinjtë e ndezur ngrohin ajrin brënda vazove. Të dyja vazot e kthyera përmbys mbi tabaka duhet të kenë një vrimë në fund, e cila lejon daljen e ajrit të ngrohtë që krijohet brënda si rrjedhojë e krijimit të një rryme konvecioni midis ajrit të ngrohtë dhe atij të ftohtë.

Ideatori i këtij sistemi ngrohjeje shpjegon se mjaftojnë vetëm katër qirinj për të ngrohur një dhomë. Secili qiri i ndezur zgjat rreth katër orë, pra mjafton të përdoren katër qirinj paradite dhe katër pasdite për të ngrohur të gjithë dhomën me një kosto prej vetëm 10 cent në ditë.

Video e publikuar në youtube rreth këtij mekanizmi ngrohjeje ka arritur më shumë se 3 milion klikime.

Daniela Vathi

Dërgo me email | Stampo artikullin