16/11/2013 20:23:15

Pulë me rosnica në tavë

nga Brunhilda Çela

Sekretet e aromave të Brunhildës Kjo është një recetë tradicionale shqiptare që në zonën e Fierit bëhet me zogj fshati ose pulë fshati dhe sigurisht më e mirë e më e shijshme del nëse bëhet në saç (foto ).

Por nuk përdoret vetëm në zonën e Myzeqesë mesa kam mësuar nga miket e mia bëhet dhe në Vlorë. Quhet pulë me thërime dhe në Korçë i thonë pulë me dromka: në fakt dhe hungarezët kanë një specialitet të ngjashëm që e bëjnë pak a shumë si ne në tavë ose në tenxhere me mish por më me tepër përbërës brenda dhe speca, domate dhe rosnicave i thonë tarhonya (pak a shumë e përafërt me fjalën tonë trahana, apo trahan).

Unë dje e bëra me një pulë bio dhe në kushte shtëpie në furrë të sobës. Nga përbërësit që shihni dhe në foto kam dalë nga receta tradicionale pasi ajo tradicionale nuk përmban shumë përbërës përveç risnicave, lëngut të zogjve apo pulave, qepen e gjalpin.

Po ta kisha zog fshati as unë nuk do i vija shumë gjëra por për ta bërë lëngun më të shijshëm gjatë zierjesh i shtova dhe karota, pak selino, presh, kokrra piperi.

Receta ime ishte kjo:
1 pulë bio
4 garuzhdë rosnica
12 garuzhdë lëng pule
1 qepë të vogël (unë përdora qepujka)
pak presh
1 spec i vogël sa për aromë (kush nuk e pëlqen ta lërë fare)
pak selino
3 karota
ca kokrra piperi
vaj ulliri
kripë

Në fillim zieva pulën të prerë në copa me ujë, kripë, 2 karota, presh,1 spec të vogël, selino, kokrra piperi, një qepë të pa qëruar nga lëkura që të marrë ngjyrë të bukur lëngu i pulës.

Qepën mund ta piqni më parë në tigan pa vaj duke e prerë tërthor i jep akoma më shumë aromë lëngut. Unë e vura të gjithë pulën për zierje që të përfitoja një lëng të mirë por nuk i vura të gjitha thelat në tavë vetëm gjoksin dhe kofshët. Pjesën tjetër e lashë ta bëj supë nesër.

Pasi lëngu është gati dhe pula është zier e kulloj dhe marr 12 garuzhdë lëngun i vë veçan në një tenxhere të vogël. Në një tenxhere shtoj vaj uliri qepën e grirë imët dhe e kavërdis pak sa të zverdhet.

Shtoj dhe rosnicat dhe vazhdoj ti skuq sa të marrin pak ngjyrë por jo të digjen. Nga fundi i shtoj dhe karotat. E shuaj me lëngun e valuar dhe i lë të marrë ca valë në tenxhere. Pastaj e transferoj në një tavë, shtoj copat e pulës aty dhe e pjek në furrë në 200 gradë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin