09/11/2013 08:53:55

Bruschetta

nga Brunhilda Çela

Sekretet e aromave të Brunhildës Kjo ishte dreka e sotme, një mënyrë për të pastruar ngrirësin dhe frigoriferin, po kështu dhe bukën bajate (foto).

Këtu kam bërë dy lloje njerën me speca të pjekur (qeska e fundit që ishte në ngrirës që vjet), domate, hudhra, vaj ulliri, kripë, piper, djathë të bardhë të thermuar dhe rigon.

Bukën e skuqa lehtë në një tigan zgare më shumë pak vaj ulliri dhe në fund e lyeva me krem djathi filadelfia dhe lart shtova specat e përgatitur në tigan.

(Specat e pjekur i qëron nga lëkura, i grin imët, i skuq në një tigan me vaj ulliri, shton domatet, vazhdon kavërdisjen sa të trashen, shton hudhrat, kripë, piper, pak spec djegës, i lë të marrin ca valë dhe shton djathin e bardhë të thërmuar në fund fare me rigonin).

Ndërsa tjetrën e bëra me vaj ulliri, 3-4 qepë të njoma, 1 kungulleshkë, 2 patëllxhanë, 3 domate 1 spec të kuq, rigon, (të gjitha i kavërdisa në tigan, shikoni fotot), borzilok dhe djathë mozarella lart.

Bukën këtu nuk e skuqa fare por e lyeva me krem djathi poshtë (djath philadelphia), pastaj gjellën e përgatitur sipër, djathin mozarella lart, rigonin dhe i poqa në furrën e paranxehur në 250 gradë rreth 7 min.

Këtë e shikoni vetë sa të shkrijë djathi dhe buka të marrë pak faqe. E shoqërova me një sallatë jeshile të përzier me domate, kastraveca, qepë dhe majdanoz të ngrirë hollë. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin