04/11/2013 10:27:58

Zgjedhjet: fituesit e parë në Kosovë

Incidente në Mitrovicë, Vetëvendosje rrit përqindjen e votave

PRISHTINË - Pas votimeve të djeshme në zgjedhjet lokale në Kosovë dy partitë më të mëdha, PDK në pozitë dhe LDK opozitare kanë shpallur fitoren në nivel vendi, ndërkohë që rezultatet e plota paraprake ende nuk janë shpallur nga KQZ.

Sipas rezultateve paraprake të publikuara deri tani dhe nga Demokracia në Veprim, LDK ka shënuar ngritje me numrin e votave në nivel vendi.

Lëvizja Vetëvendosje ka shënuar ngritje në këto zgjedhje dhe në kryeqytet kandidati i saj, Shpend Ahmeti me rreth 31% të votave shkon në balotazh me kryetarin e aktual të Prishtinës e të LDK-së, Isa Mustafa me rreth 43%.

Gjithnjë sipas të dhënave jo të plota, PDK e para dhe LDK e dyta shkojnë në balotazh në Prizren, ndërsa LDK e para dhe PDK e dyta shkojnë në balotazh në Gjilan, qytete këto të mëdha të Kosovës.

Ndonëse mbetet të priten rezultatet përfundimtare të votimeve të djeshme dhe të balotazheve në shumë komuna vlerësohet se dje Kosova zhvilloi zgjedhje për ndryshime.

"Ndryshon Kosova", është një nga kryetitujt e shtypit të sotëm kosovar, ku theksohet se "zgjedhjet lokale po e ridefinojnë skenën politike në Kosovë", ndërsa një kryetitull tjetër është "Zgjedhjet nisin ndryshimet – dështojnë në veri".

Në veri dje incidentet në disa vendvotime ndërprenë votimet dhe KQZ mbrëmë nuk publikoi as përqindjen e pjesëmarrjes në zgjedhje në katër komuna atje - Mitrovicë e Veriut, Leposaviç, Zveçan e Zubin Potok.

Lehtësuesit e OSBE-së për zgjedhje janë detyruar të tërhiqen nga vendvotimet në Mitrovicën e Veriut mes orës 17:00 dhe 18:00 për shkak të incidenteve të rënda dhe shqetësimeve të sigurisë. 70 pjesëtarë të OSBE-së janë tërhequr dhe asnjëri nga ta nuk është lënduar, njoftoi mbrëmë Misioni i OSBE në Kosovë.

Si përgjigjje ndaj kësaj, OSBE ka kërkuar autorizim nga KQZ-ja që t’i mbyllë vendvotimet në tri komunat tjera veriore në orën 18:30 dhe t’i mbajë në posedim materialet zgjedhore. Aktualisht, materialet zgjedhore nga tri komunat veriore janë në posedim të OSBE-së. Na ndiqni dhe në Facebook dhe Twitter

HermesNews - ©2013

Dërgo me email | Stampo artikullin