25/10/2013 15:54:03

Celet panairi 'Expo Vlora 2013'

Modelt e ndertimit dhe fushat qe lidhen me te

VLORE- Në qytetin e Vlorës, u çel sot Panairi “Expo Vlora Ndërtim 2013”, me pjesëmarrjen e subjekteve që ushtrojnë aktivitetin në sektorin e ndërtimit dhe fushat që lidhen me të, organizuar nga firma “Idea Group 2” në bashkëpunim me Bashkinë dhe Dhomën e Tregtisë dhe Industrisë.

Në këtë panair, përfaqësohen me produktet e tyre, më shumë se 40 subjekte nga Vlora dhe rrethe fqinjë. Mes tyre, përfshihen firma të njohura në fushën e ndërtimit, në atë të prodhimit të mobiljeve, të dyerve e dritareve, të shërbimeve dhe tregtimit të pajisjeve hidrosanitare e aksesorëve, duraluminit, etj. Ky panair do të qëndrojë hapur 3 ditë.

Me këtë rast, në sheshin përpara Pallatit të Sportit “Flamurtari”, ku u çel ky panair, u zhvillua një ceremoni me praninë e qytetarëve, deputetëve të Vlorës, përfaqësuesve të pushtetit vendor, Prefektit të Qarkut Besnik Dervishi, Konsullit të Përgjithshëm të Italisë në Vlorë, Dr.Stefano Bergesio, etj.

Deputetja e Vlorës, Valentina Leskaj, theksoi mes të tjerash se, ky aktivitet nuk është i rëndësishëm vetëm për Vlorën, por më gjerë. “Ka një rëndësi rajonale, për vetë peshën që zë qyteti i Vlorës, tani, por edhe në funksion të perspektivës”, theksoi Leskaj. Sipas saj, Vlora është në vëmendjen e Qeverisë dhe për zhvillimin e transformimin e saj, ka një projekt konkret. “Në funksion të boshtit të Jugut, Vlora, si një metropol, do të ketë një peshë gjithnjë e në rritje”, theksoi deputetja e Partisë Socialiste për Vlorën, Valentina Leskaj.

Kryetari i Dhomës së Tregtisë dhe Industrisë, Arben Breshani, u ndal në peshën që zë sektori i ndërtimit në profilin ekonomik dhe social të Vlorës. “Në periudhën 2000-2010, ndërtimi shënoi një “boom”, çka u shoqërua edhe me transformimin e qytetit, ndërkohë që aktualisht, ai është në një moment stanjacioni, ndikuar edhe nga faktorë rajonalë”, theksoi Breshani.

Administratori i kompanisë “ATRA Group”, Arsen Troka, theksoi se, “krahas tregut të jashtëm, duhet kthyer gjithnjë e më tepër vështrimi në tregun e brendshëm. “Aktualisht, kjo po reflekton edhe në aktivitetin e firmës tonë, që po shfaqet gjithnjë e më tepër më produktet e veta në Vlorë, Fier, Tiranë, Lushnje, Berat etj”, theksoi Troka. Ai vlerësoi se edhe prania në këtë panair dhe vetë ky panair, tregojnë tendencën e zhvillimit të sektorit të ndërtimit dhe fushave që lidhen me të, sikundër është prodhimi i mobiljeve

HermesNews-©2013

Dërgo me email | Stampo artikullin