25/10/2013 15:12:24

Duke biseduar me Drita Pelinkun

Arkivi Qendror i Filmit promovon botimin e librit

TIRANE- Arkivi Qendror Shtetëror i Filmit edhe këtë sezon ka në kalendarin e tij të aktiviteteve disa veprimtari, që kanë në fokus jetën dhe veprën e emrave më të njohur të kinemasë shqiptare. Në ditët e para të muajit nëntor, AQSHF do të promovojë një botim shumë të rëndësishëm, kushtuar aktores që u nda nga jeta para disa javësh, Drita Pelinku. “Duke biseduar me Drita Pelinkun", titullohet botimi që AQSHF ka menduar për nder të aktores së njohur të filmit dhe skenës shqiptare. Ky botim përmbledh një material që daton nga viti 1986 deri më 2013.

Botimi me rreth 300 faqe përmban materialet më të veçanta për aktoren, atë që ajo ka shkruar për artistët e tjerë apo dhe intervistat që janë bërë me aktoren. Ky është dhe botimi i dytë që përgatit AQSHF në nder të aktores së madhe, pas katalogut në vitin 2010.

Flori Sllatina, specialist pranë AQSHF-së, shprehet se është menduar që dhe këtë botim ta promovojë atje ku ka menduar dhe vetë aktorja më herët, në një atmosferë që duket se do të mbledhë jo pak emra të kinemasë, si dhe të tjerë personalitete të artit dhe kulturës.

Sllatina tregon se vetëm një javë para se aktorja të ndahej nga jeta ishte njohur me librin, duke treguar dhe dëshirën e madhe për promovimin e tij, por fatkeqësisht ajo u nda nga jeta. "U njoh me këtë botim një javë para se të ndahej nga jeta. U gëzua shumë, foli për promovimin, i pëlqeu ky libër, por për shkak të sëmundjes nuk u arrit dot të promovohej sa ajo ishte gjallë”, shton më tej specialisti Sllatina

HermesNews-©2013

Dërgo me email | Stampo artikullin